Trump paralajmëron Iranin: Nëse po rindërton programin bërthamor, do ta godasim

Presidenti i Shteteve të Bashkuara, Donald Trump, paralajmëroi ashpër Iranin se SHBA do të reagojë ushtarakisht nëse Teherani po rindërton programin e tij bërthamor, duke deklaruar se “do ta godasim” nëse kjo konfirmohet.

Deklaratat u bënë para mediave, në fillim të takimit të tij me kryeministrin izraelit Benjamin Netanyahu, i cili ndodhet për vizitë në Mar-a-Lago.

“Tani dëgjoj që Irani po përpiqet të rindërtohet dhe, nëse është kështu, do të na duhet ta godasim. Do ta godasim fort”, u shpreh Trump.

“Kam dëgjuar se Irani dëshiron të bëjë një marrëveshje. Nëse e duan një marrëveshje, kjo është shumë më e zgjuar”, tha presidenti amerikan.

“Duhet të ketë çarmatim. Hamas duhet të çarmatoset”, tha ai, ndërsa qëndronte pranë Netanyahu-t.

Kryeministri izraelit pritet të diskutojë me Trump planin për armëpushim në Gaza, si dhe programin e raketave balistike të Iranit.

Para takimit me presidentin amerikan, Netanyahu zhvilloi takime edhe me Sekretarin e Shtetit Marco Rubio dhe Sekretarin e Mbrojtjes Pete Hegseth.