Tubimi pro Erion Veliajt para GJKKO-së, Policia i përgjigjet Gjykatës dhe SPAK

Drejtoria e policisë së Tiranës ka reaguar lidhur me shkresën që Gjykata e Posaçme dhe SPAK dërguan duke i kërkuar ‘llogari’ se përse nuk iu përgjigjën kërkesës së Gardës për të marrë masa për situatën e krijuar para GJKKO ku u mblodhën mbështetës të kryebashkiakut Erion Veliaj gjatë seancës së 12 shkurtit për verifikimin e masës së sigurisë. Të dy institucionet e drejtësisë iu drejtuan me shkresa të veçanta Ministrisë së Brendshme, Policisë së Shtetit, AMP-së, duke kërkuar sqarime se pse nuk u morën masat dhe vendosjen para përgjegjësisë të atyre që nuk morën masa.

Në reagimin e saj policia thotë se nuk ka ndodhur më parë, që organet ligjzbatuese komunikojnë përmes mediave ndërkohë që kanalet institucionale të komunikimit kanë qenë jo vetëm mëse të mjaftueshme, po edhe plotësisht efikase.

“Në kuadër të angazhimit për ruajtjen e rendit dhe sigurisë publike gjatë zhvillimit të seancës gjyqësore janë angazhuar në total 77 punonjës policie. Seanca gjyqësore ka filluar e qetë, ka vijuar normalisht dhe ka përfunduar pa asnjë problem.

Në adresë të shërbimeve policore, as nga Garda e Republikës brenda ambienteve të Gjykatës së Posaçme, as nga prokurorë, gjyqtarë e avokatë nuk është prezantuar asnjë shqetësim, apo te jete kërkuar ndihmë për vendosje të rendit dhe sigurisë në ambientet e brendshme, apo të jashtme të Gjykatës.

DVP Tiranë thekson se nuk ka marrë asnjë njoftim në formë shkresore apo verbale, apo telefonatë të drejtuar në Sallën e Menaxhimit dhe Drejtimit në Drejtorinë Vendore të Policisë Tiranë, ku punonjës të Gardës së Republikës apo ndonjë entitet tjetër, të kenë njoftuar për cenim të rendit dhe sigurisë publike, apo paligjshmëri të tjera pranë dhe përreth godinës së Gjykatës së Posaçme”