Turqia, turizëm për rusët dhe dronë për ukrainasit

Turqia, turizëm për rusët dhe dronë për ukrainasit

Turizmi në Turqi po rimëkëmbet pas rënies së mprehtë për shkak të pandemisë. Vizitorët e huaj janë një burim i madh të ardhurash, duke përfshirë restorantet e ushqimeve të detit në brigjet e ngushticës së Bosforit në Stamboll.

Ndërsa turistët rusë vazhdojnë të vijnë në Turqi, Bashkimi Evropian po shtrëngon rregullat që kufizojnë hyrjen e tyre, një masë kjo që vjen pasi qeveria ukrainase i ka kërkuar BE-së dhe G7-ës të bllokojnë vizat për turistët rusë. Ministria e Jashtme e Ukrainës nuk ka folur nëse Turqia duhet të bëjë të njëjtën gjë. Ankaraja luajti një rol unik në luftë, duke ofruar dronë për Ukrainën por edhe duke ruajtur një marrëdhënie të vecantë financiare me Rusinë.

Përgjatë bregdetit turk, mund të shihen shumë varka luksoze në pronësi të oligarkëve rusë, të cilat mbërritën këtu pas sanksioneve perëndimore kundër Moskës. Në gusht, Shtetet e Bashkuara paralajmëruan për rrezikun e sanksioneve edhe për kompanitë turke nëse do të punonin me rusët e listës së zezë. Ankaraja i shmangu polemikave dhe tha se do të përmirësonte tregtinë me fqinjët e saj duke mos shkuar kundër sanksioneve.

Turqia nuk dëshiron të heqë dorë nga kontributi i rusëve në ekonominë e saj të trazuar, aq më tepër tani që vendi ka një normë zyrtare inflacioni mbi 80%. Kjo e ka ‘tendosur’ popullaritetin e presidentit turk Rexhep Tajip Erdogan teksa vendi po përgatitet të përballet për zgjedhje të reja. Statistikat thonë se Rusia është burimi i dytë më i madh i sektorit të turizmit në Turqi, me afro 2.2 milionë njerëz që e vizituan në 7 muajt e parë të vitit.