U tërhoq nga gara Presidenciale, Biden mendon se gaboi/ Ja ‘pengu’ tjetër i Presidentit në detyrë

Presidenti në detyrë Joe Biden tha se i vinte keq që u tërhoq nga gara presidenciale e këtij viti dhe beson se do të kishte mundur Donald Trump në zgjedhjet e muajit të kaluar – pavarësisht indikacioneve negative të sondazheve, kanë thënë burimet e Shtëpisë së Bardhë.

Presidenti amerikan thuhet se e ka konsideruar si një gabim zgjedhjen e Merrick Garland si prokuror të përgjithshëm – duke reflektuar se Garland, një ish-gjykatës i Apelit në SHBA, ishte i ngadalshëm në ndjekjen penale të Donald Trump për rolin e tij në kryengritjen e 6 janarit 2021 ndërsa kryesonte departamentin e drejtësisë, që ndoqi penalisht në mënyrë agresive djalin e Biden, Hunterin.

Reflektimet e raportuara mbi Biden zbulohen në një profil të Washington Post, ku thuhet se Biden mendon se gaboi me tërheqjen e kandidaturës së tij në korrik, pas një debati të mjerueshëm kundër rivalit të tij për Shtëpinë e Bardhë, Donald Trump.

Presidenti u largua – për t’u zëvendësuar nga zëvendëspresidentja e SHBA, Kamala Harris – pas presionit në rritje nga demokratët, të cilët iu referuan sondazheve, të cilat tregonin se po shkohej drejt një zgjedhjeje thuajse të sigurt të Donald Trump, i cili po kërkonte një rikthim historik në Shtëpinë e Bardhë si kandidati i republikanëve.

Caktimi i Harris si kandidate e demokratëve çoi në një rritje të entuziazmit dhe përmirësim të sondazheve, por përfundimisht rezuloi me humbje në kolegjin elektoral dhe humbje të votave popullore.

Ndërsa Biden dhe ndihmësit e tij kanë qenë të kujdesshëm për të mos fajësuar Harrisin, ata me sa duket besojnë se rezultati do të ishte ndryshe nëse ai do të kishte qëndruar në pozicionin e tij, sipas raportimit të Washington Post.

Por kjo është një pikëpamje e kontestuar nga shumë mbështetës të Harris, të cilët fajësojnë presidentin se u tërhoq me shumë vonesë, duke i lënë kështu zëvendëspresidentes më pak kohë për të zhvilluar një fushatë efektive.

Ata gjithashtu theksojnë se vendosmëria e Biden për të kërkuar një mandat të dytë shkeli zotimin e tij të fushatës së vitit 2020 për të qenë një figurë “kalimtare”.

“Biden kandidoi me premtimin se ai do të ishte një president kalimtar dhe se do t’ia dorëzonte atë një brezi tjetër”, tha Richard Blumenthal, një senator demokrat i Connecticut.

Dyshimet e presidentit në largim për Garland janë tronditëse duke pasur parasysh se ai e shpalli atë si kandidatin e tij për prokurorin e përgjithshëm një ditë pasi një turmë sulmoi Kapitolin e SHBA më 6 janar 2021 në një përpjekje që përfundimisht dështoi për të përmbysur fitoren e Bidenit në zgjedhjet presidenciale të vitit 2020.

Në atë kohë, Biden tha se Garland do të rivendoste “nderin, integritetin, pavarësinë” e departamentit të drejtësisë pas viteve të politizimit të perceptuar nën Presidencën Trump.

“Besnikëria juaj nuk është për mua, është për ligjin, për kushtetutën, për njerëzit e këtij kombi”, i tha Biden, Garland.

Biden tani beson se ai duhet të kishte zgjedhur dikë tjetër, raportoi Post, një pikëpamje në përputhje me shumë demokratë, të cilët besojnë se Garland ishte shumë i ngadalshëm për të hetuar dhe përfundimisht për të ndjekur penalisht Trump për 6 janarin dhe aktivitetet e lidhura me të.