Ukrainë, vritet ish-futbollisti rus i arrestuar për trafik droge

Në vitin 2004 ishte pjesë e Kombëtares ruse në europianin e Portugalisë, madje u aktivizua në 2 duele, ndërsa në orët e fundit raportohet se është vrarë në luftën në Ukrainë.

Bëhet fjalë për rusin Aleksey Bugaev, 43-vjecar i cili prej 1 viti i ishte bashkuar ushtrisë së vendit të tij dhe luftonte në pushtimin e Ukrainës.

Mediat ruse kanë konfirmuar vdekjen e ish-futbollistit të tyre, pasi ka qenë avokati i tij Anton Smirnov i cili ka bërë me dije se klienti i tij mbeti i vrarë gjatë një përplasje në Ukrainë.

Trupi i tij ende nuk është tërhequr, për shkak të luftimeve të vazhdueshme.

Aleksey Bugaev ka luajtur për disa skuadra në kampionatin rus mes tyre dhe Lokomotiva e Moskës e Krasnodar. Gjitashtu ai numëron 7 paraqitje me ekipin A të Rusisë, por pa mundur të shënojë gol.

Kujtojmë se karrierën si futbollist e mbylli shpejt, që në moshën 29-vjecare në vitin 2010, ndërsa u përfshi në trafikun e drogës, për të cilin u arrestua nga policia.

Për të shmangur dënimin, Bugaev vendosi t’i bashkohej ushtrisë në luftën me Ukrainën, ku dhe mbeti viktimë.