Ushtria izraelite paralajmëron: Shkatërrimi i Gazës mund të zgjasë mbi një vit

Ushtria izraelite ka paralajmëruar qeverinë se zbatimi i planit për të shkatërruar tërësisht qytetin e Gazës – si mbi tokë ashtu edhe nëntokë – mund të zgjasë më shumë se një vit.

Paralajmërimi vjen pas kërcënimit të Ministrit të Mbrojtjes, Israel Katz, se nëse Hamasi nuk pranon kushtet e Izraelit, Qyteti i Gazës do të pësojë të njëjtin fat si Rafah dhe Beit Hanoun.

Sipas Haaretz dhe The Times of Israel, IDF-ja ka shprehur shqetësime të thella për ndikimin që një ofensivë e tillë do të kishte mbi forcat rezerviste, që aktualisht përballen me moral të ulët dhe rënie të pjesëmarrjes.

Shefi i shtabit të IDF-së, Eyal Zamir, i ka kërkuar qeverisë që të mos nisë asnjë operacion të madh pa u krijuar më parë një “zonë humanitare” për civilët palestinezë në Qytetin e Gazës.

Ai ka këmbëngulur gjithashtu që çdo veprim të ndjekë procedurat operacionale dhe ligjore, pavarësisht presionit nga kryeministri Benjamin Netanyahu për të përshpejtuar sulmin.

Evakuimi i 1.2 milion banorëve do të kërkojë javë të tëra përgatitjesh, dhe asnjë zonë e sigurt për strehimin e tyre nuk është ngritur ende.

IDF-ja gjithashtu paralajmëron se siguria e pengjeve izraelite mbetet një shqetësim madhor, duke theksuar nevojën për të shfrytëzuar çdo mundësi për marrëveshje për lirimin e tyre përpara nisjes së ofensivës.

Aktualisht, tre divizione izraelite po operojnë në Gaza, ndërsa rreth 60 mijë rezervistë janë thirrur për t’u paraqitur më 2 shtator.