Vjosa Osmani “asfaltoi” Vuçiçin në OKB, profesori amerikan: Surpriza e vërtetë ishte Rusi-Kosovë

Përballja mes Kosovës dhe Serbisë në Këshillin e Sigurimit të Kombeve të Bashkuara prodhoi një fitues të padiskutueshëm: presidenten Vjosa Osmani. Kështu mendon profesori i shquar amerikan, Edward Josep, njohës shumë i mirë zhvillimeve në Ballkan.

Profesori i Universitetit “John Hopkins”, përmes rrjetit social X, thotë se fjalimi i presidentit serb, Aleksandër Vuçiç, u tejkalua nga presidentja dinjitoze dhe shumë e përgatitur. Ajo që i tërhoqi vëmendjen ekspertit, ishte Rusia.

“Surpriza e vërtetë: Kosova dhe Rusia ranë dakord për rëndësinë e fushatës ajrore të NATO-s të vitit 1999”, shkruan Josep duke risjellë në vëmendje deklaratat përkatëse.

Osmani tha gjatë përballjes në OKB se “ndërhyrja e NATO-s shënoi një moment historik vendimtar në historinë e njerëzimit”. Ndërsa përfaqësuesi rus nënvizoi se “agresioni i NATO-s kundër ish-Jugosllavisë u bë një pikë kthese në historinë globale”.

“Kosova është thjesht një mjet për Moskën që ta përdorë kundër Ukrainës. Putin tashmë e ka tradhëtuar Serbinë, duke e përdorur ndërhyrjen krejtësisht të ndryshme të NATO-s në rastin e Kosovës për të legjitimuar agresionin rus kundër Ukrainës”, shkruan Josep.

“Kosova ka bërë shumë progres që prej pavarësisë. Roli i UNMIK-ut duhet të rishikohet, pasi situata në Kosovë është shumë më ndryshe nga se ishte 25 vite më parë”, nënvizoi diplomatja.