Vuçiç, hibridi i të gjithë liderëve të Serbisë/ Mund t’ia kthejë shpinën Perëndimit

“Mendoj se presidenti Aleksandër Vuçiç është hibrid i të gjithë liderëve të Serbisë, prej të cilëve mori më të keqen” – Kështu tha në një intervistë Aleksandër Stoshiç, magjistër i shkencave politike dhe ish-gazetar dhe redaktor i gazetës së Beogradit ‘Danas’.

Ai theksoi se zgjidhja e çështjes së Kosovës, sado e dhimbshme të jetë, mund ta kthejë shoqërinë serbe drejt së ardhmes dhe të përpiqet ta vendosë të kaluarën në një kornizë të pranueshme për ta kuptuar secili prej nesh.

Stoshiç theksoi se ekziston mundësia që gjithçka të përfundojë si rasti në Kiev në vitet 2013/2014 kur përfundimisht u nënshkrua Marrëveshja me BE-në.

“Edhe pse nuk e besoj, nuk do të habitesha që të ndodhte skenari i Yanukovych-it, që Vuçiç ti dorëzohet Putinit në momentin e fundit kur ta shoh se nuk ka ku të shkojë tjetër, duke i kthyer shpinën Perëndimit” – potencoi ish kryeredaktori i Danas.

E vetmja mundësi, sipas mendimit të tij, që mund të jetë pozitive për Serbinë që të pushojë së bredhuri, është “në njëfarë kuptimi hipotetik, nëse Putini do ta humbiste luftën dhe do të zëvendësohej me dike tjetër në Rusi”

“Nuk e di saktësisht nëse Putini është Millosheviç apo Millosheviçi ishte në të vërtetë vetëm një levë e KGB-së. Në fund të fundit, politikanët, autokratët, diktatorët janë shumë të ngjashëm në metodologji, organizojnë shoqëritë në një mënyrë shumë të ngjashme. Mënyra se si Milloshevici i trajtoi fqinjët e tij – kroatët, boshnjakët në Bosnje dhe Hercegovinë, shqiptarët e Kosovës ishte absolutisht identike me atë që po bën Putin me Ukrainën. Përsa  i përket Vuçicit, ai ka nxjerrë përfundime nga sundimi i ndoshta të gjithë pushtetarëve të mëparshëm që kanë qenë në 25 vitet e fundit në Serbi, duke filluar nga Milloshevici, Gjingjici, Koshtunica dhe Tadiç.

Ai ka mësuar nga gabimet e paraardhësve, por jo në kuptimin e përmirësimit të cilësisë së shoqërisë dhe zhvillimit të institucioneve demokratike, pluralizmit, transparencës, por duke i kthyer të gjitha këto në drejtim të vetëruajtjes së pushtetit dhe dhunës” – ka theksuar Aleksandër Stoshiç

Duke folur për marrëdhëniet e Serbisë me Kosovën, ai u shpreh: Do të doja që Kosova të mbyllej si temë, t’i drejtohemi së ardhmes. Le të shohim se si irlandezët arritën ta përmbysin situatën e tyre të vështirë historike që kishin me shtetin britanik. Këto janë shembuj shumë pozitivë. Kjo do të jetë e ardhmja e rajonit, do të shohim nëse do ketë relaksim në kohën e Vuçiçit apo të një presidenti tjetër.