Zbulohen detajet, si u vra 30-vjeçari shqiptar në Spanjë (EMRI)

Është vrarë me thikë në Spanjë një shqiptar rreth 30 vjeç nga Selenica. Endrit Zykaj rezulton të ketë qenë pa dokumente dhe dyshohet se ka qenë pjesëtar i një grupi kriminal, anëtarët e së cilës visheshin si Polic dhe bënin grabitje të drogës, por jo vetëm në fshatrat e Selenicës.

Ndërkohë pas ngjarjes së rëndë, mësohet se miku i ngushtë i Zykajt, ose mund të jetë fshehur ose zhdukur, pasi ka kohë që ka humbur kontaktet me familjarët e tij të cilët po e kërkojnë kudo. Vrasja e Zykajt ka ndodhur të dielën e kaluar, por mediat e huaja e kanë raportuar sot.

Rrethanat e ngjarjes nuk dihen ende, teksa mediat e huaja shkruajnë se shqiptari është i lënë i vetëm në dyert e spitalit Girona nga persona që ende nuk janë identifikuar nga policia spanjolle e cila po heton rrethanat e ngjarjes së rëndë të regjistruar në datë 23 prill.

Personat në fjalë që e kanë dërguar shqiptarin në spital, janë larguar menjëherë nga vendi, duke lënë të vdekur në dyert e spitalit të riun. Zykaj u mor nga mjekët dhe iu nënshtrua trajtimit mjekësor për më shumë se 45 minuta, por nuk arriti të mbijetonte.

Ndërkohë deri tani, kamerat e sigurisë së spitalit kanë arritur të zbulojnë vetëm targën e mjetit që dërgoi shqiptarin në spital dhe mendohet se personat që dërguan Zykajn në spital, janë shqiptarë.