344 MILIONË EURO NDEZIN KOSOVËN/ KOMUNAT SOT NË PROTESTË

Kosova nis shtatorin me një përplasje të fortë mes pushtetit lokal dhe atij qendror.

Kryetarët e komunave do të dalin sot, 1 shtator, në orën 11:00, në protestë në Sheshin “Skënderbeu” në Prishtinë, përballë ndërtesës së Qeverisë së Kosovës.

Në qendër të përplasjes janë paratë.

Kryetari i Prishtinës, Përparim Rama, pretendon se prej vitit 2022 komunave u janë marrë nga buxhetet mbi 344 milionë euro për detyrime të krijuara në nivelin qendror.

Sipas tij, vetëm gjatë katër muajve të parë të këtij viti, rreth 55 milionë euro janë marrë nga buxhetet komunale, ndërsa 37.5 milionë euro të të hyrave vetanake të komunave janë bllokuar.

Rama argumenton se këto janë para që duhet të përktheheshin në shkolla, çerdhe, rrugë, shëndetësi dhe investime për qytetarët.

Por protesta nuk lidhet vetëm me financat.

Asociacioni i Komunave të Kosovës kërkon mbrojtjen e buxheteve dhe pronave komunale, respektimin e kompetencave të pushtetit lokal, kompensimin e detyrimeve që burojnë nga kontratat kolektive, financim më të drejtë dhe ndalimin e ndërhyrjeve të nivelit qendror në autonominë lokale.

Kryetari i Gjakovës, Ardian Gjini, ka ngritur gjithashtu shqetësimin për shkurtimin e buxheteve, moskompensimin e dëmeve nga fatkeqësitë natyrore dhe kufizimin e kompetencave të komunave.

Organizatorët e kanë shpallur protestën paqësore, institucionale dhe jopartiake.

Por shifra prej 344 milionë eurosh e kthen përplasjen në një çështje shumë më të madhe sesa një konflikt administrativ.

Nëse komunat pretendojnë se qindra milionë euro janë larguar nga buxhetet e tyre, pyetja është: kush duhet ta paguajë faturën dhe çfarë investimesh kanë mbetur pa u bërë për qytetarët e Kosovës?

#Kosova #Prishtina #344MilioneEuro #Komunat #QeveriaEKosoves #Proteste #PerparimRama #NTV #NTVNews