Dobësim pa dietë ekstreme/ Eksperti italian tregon rregullat që ndihmojnë në humbjen e peshës

Humbja e peshës nuk kërkon domosdoshmërisht dieta ekstreme, numërim të vazhdueshëm të kalorive apo kufizime të papërballueshme. Sipas mjekut dhe epidemiologut të njohur italian Franco Berrino, rezultatet më të qëndrueshme vijnë nga disa ndryshime të thjeshta në mënyrën e të ushqyerit dhe stilin e jetesës.

Berrino, i cili për shumë vite ka drejtuar Departamentin e Mjekësisë Parandaluese dhe Parashikuese në Institutin Kombëtar të Tumoreve në Milano, njihet për studimet e tij mbi lidhjen ndërmjet ushqyerjes, sëmundjeve kronike dhe parandalimit.

𝗣𝗘𝗦Ë 𝗥𝗥𝗘𝗚𝗨𝗟𝗟𝗔𝗧 𝗤Ë 𝗡𝗗𝗜𝗛𝗠𝗢𝗝𝗡Ë 𝗡Ë 𝗞𝗢𝗡𝗧𝗥𝗢𝗟𝗟𝗜𝗡 𝗘 𝗣𝗘𝗦𝗛Ë𝗦

1. Përtypeni mirë ushqimin

Të ngrënit ngadalë i jep organizmit kohën e nevojshme për të perceptuar ngopjen. Përtypja e kujdesshme mund të ndihmojë në uljen e oreksit dhe të shmangë konsumimin e sasive më të mëdha se nevojat reale.

2. Hani darkë herët

Berrino këshillon që ndërmjet darkës dhe vaktit të parë të ditës tjetër të kalojnë rreth 14 orë. Darka duhet të jetë e hershme dhe e lehtë, pasi ngrënia e sasive të mëdha gjatë orëve të vona lidhet me kontroll më të dobët të peshës.

Megjithatë, një interval i tillë nuk është i përshtatshëm për të gjithë dhe personat me diabet, probleme shëndetësore ose që marrin barna duhet të këshillohen me mjekun.

3. Zgjidhni ushqime që ngopin më gjatë

Bishtajoret, perimet, zarzavatet dhe drithërat integrale përmbajnë fibra, të cilat ndihmojnë ngopjen dhe funksionimin e zorrëve. Ato mund të përfshihen edhe në gatimet tradicionale shqiptare, duke kontrolluar sasinë e yndyrës dhe porcionet.

4. Kufizoni ushqimet e ultr përpunuara

Sheqeri i shtuar, pijet energjike dhe të gazuara, patatinat, ëmbëlsirat industriale dhe produktet e skuqura duhet të konsumohen sa më rrallë. Problemi nuk qëndron te një ushqim i vetëm, por te konsumimi i shpeshtë i produkteve me shumë kalori, sheqer, kripë dhe yndyrna.

5. Ecni dhe lëvizni çdo ditë

Aktiviteti fizik ndihmon shpenzimin e energjisë, qarkullimin e gjakut dhe ruajtjen e masës muskulore. Ecja është forma më e thjeshtë për të filluar, por për rezultate më të mira duhet të shoqërohet edhe me ushtrime force, sipas mundësive individuale.

𝗡𝗨𝗞 𝗞𝗔 𝗡𝗝Ë 𝗙𝗢𝗥𝗠𝗨𝗟Ë 𝗤Ë 𝗩𝗟𝗘𝗡 𝗣Ë𝗥 𝗧Ë 𝗚𝗝𝗜𝗧𝗛Ë

Këto rregulla mund ta mbështesin humbjen e peshës, por nuk garantojnë se çdo person do të dobësohet automatikisht. Rezultati varet nga sasia e përgjithshme e ushqimit, aktiviteti fizik, gjumi, metabolizmi, mosha dhe gjendja shëndetësore.

Mesazhi kryesor i Berrinos është i qartë: më shumë rëndësi sesa një dietë e përkohshme ka krijimi i zakoneve që mund të ruhen gjatë gjithë jetës.