36 vite, një komedi politike/ Murrizi: Rama-Berisha luftën e bëjnë sa për sy e faqe

Ish-deputeti Myslim Murrizi ka publikuar një reagim me tone të ashpra ndaj klasës politike, sistemit të drejtësisë dhe mënyrës se si është qeverisur Shqipëria gjatë 36 viteve të fundit.

Duke iu referuar periudhës pas rënies së komunizmit, Murrizi pretendon se politika shqiptare ka vijuar të ndikohet nga persona me të kaluar në regjimin komunist dhe se përplasjet mes partive kanë qenë shpesh vetëm fasadë.

“Prej 36 vjetësh bëjnë sikur luftojnë me njëri-tjetrin, por në fakt janë së bashku në çdo hajdutllëk, pisllëk e maskarallëk që ka ndodhur në Shqipëri”, shprehet ai.

Murrizi rikthen në vëmendje edhe deklaratat e tij në Kuvend gjatë viteve 2019–2021, ku pretendon se ka denoncuar praninë e ish-funksionarëve të regjimit komunist, ish-hetuesve, prokurorëve dhe gjyqtarëve në politikë dhe institucione.

Kritika të forta ai adreson edhe ndaj rolit të misioneve ndërkombëtare që kanë asistuar reformën në drejtësi, duke përmendur OPDAT dhe EURALIUS. Sipas Murrizit, këto struktura kanë mbështetur persona që, sipas tij, kanë lidhje me sistemin e vjetër.

Pretendimet e tij nuk shoqërohen në këtë reagim me prova të reja, ndërsa ai i paraqet si një prej shkaqeve kryesore të krizës që, sipas tij, po përjeton shoqëria shqiptare.

Në fund, Murrizi e lidh këtë situatë me protestat e zhvilluara gjatë javëve të fundit, duke iu referuar sloganeve “Ju erdhi fundi” dhe “Nuk na përfaqësoni”.

Sipas tij, këto protesta shprehin një kërkesë për ndryshim të thellë politik, demokraci dhe përfaqësim të ri.

“Kjo është plaga e vërtetë e shoqërisë shqiptare”, përfundon Murrizi, duke e përshkruar sistemin aktual si një strukturë që, sipas tij, ka dështuar të shkëputet plotësisht nga e kaluara.

E plote ketu…