37-vjeçarja shtatzënë vdes rrugës për në spital, flet motra: Kërkoj drejtësi

Një ngjarje e rëndë ka tronditur Pogradecin, ku një 37-vjeçare shtatzënë, Marjana Karolina Bunaj, ka humbur jetën teksa po transportohej drejt Tiranës për ndihmë të specializuar mjekësore.

Familjarët e saj kanë ngritur pikëpyetje mbi mënyrën se si është menaxhuar situata në maternitetin e Pogradecit dhe kërkojnë që rrethanat e ngjarjes të hetohen dhe të zbardhen plotësisht.

Motra e 37-vjeçares, Albina Mekolli, e cila e shoqëroi gjatë qëndrimit në maternitet, ka rrëfyer se Marjana kishte shkuar në spital pas dhimbjeve të forta të barkut. Sipas saj, pas vizitës dhe ekografisë, mjekja roje kishte konstatuar një gjakderdhje të brendshme.

Familjarët u njoftuan më pas se 37-vjeçarja kishte nevojë për trajtim të specializuar në Tiranë. Sipas dëshmisë së motrës, gjatë kësaj kohe është diskutuar edhe mundësia e transportit me helikopter, por ky opsion nuk është realizuar.

Albina Mekolli pretendon se ka pasur vonesa përpara nisjes së ambulancës dhe se Marjana është transportuar drejt Tiranës vetëm pas orës 4 të mëngjesit.

“Mjekja foli me dikë dhe erdhën mjekët e reanimacionit, e dërguan atje dhe pati vonesa. Me ambulancë e nisën pas orës 4 të mëngjesit”, deklaroi ajo.

Sipas saj, në Pogradec nuk është kryer ndërhyrje kirurgjikale dhe gjatë orëve të qëndrimit në spital pacientes i janë vendosur serume dhe i është dhënë gjak.

Familjarët dyshojnë se vonesa në trajtim ose në transport mund të ketë ndikuar në përkeqësimin e gjendjes së saj, por kjo mbetet për t’u përcaktuar nga hetimi dhe vlerësimet mjekësore.

“Unë besoj që nëse do të kishte më shumë shpejtësi, sot do të ishte mes nesh”, u shpreh motra e 37-vjeçares, duke kërkuar drejtësi dhe zbardhjen e plotë të rrethanave.

Humbja e Marjanës ka rënduar edhe më shumë situatën për familjen, pasi bashkëshorti i saj ishte larguar drejt Shteteve të Bashkuara vetëm tre ditë para ngjarjes, me synimin për të realizuar bashkimin familjar.

Fëmija që 37-vjeçarja priste ishte i pari për çiftin. Familjarët tashmë kërkojnë që të përcaktohet nëse ka pasur neglizhencë apo vonesa në trajtim dhe nëse ato kanë ndikuar në humbjen e jetës së saj.