5-vjeçarja varroset për së gjalli në një varr çimentoje nga nëna dhe njerku

Një ngjarje e rëndë ka tronditur opinionin publik në Brazil, ku një 5-vjeçare, Maria Clara Aguirre Lisboa, është gjetur e pajetë e varrosur në një gropë të mbuluar me çimento në oborrin e banesës ku jetonte me nënën dhe njerkun e saj.

Autoritetet braziliane kanë arrestuar nënën e vajzës, Luisa Aguirre Barbosa da Silva, si dhe njerkun, Rodrigo Ribeiro Machado. Sipas hetimeve paraprake, të dy dyshohen se kanë pranuar përfshirjen në krim, ndërsa çështja po hetohet si një rast i rëndë i vrasjes dhe fshehjes së trupit.

Ekspertiza mjeko-ligjore ka zbuluar se shkaku i vdekjes dyshohet të jetë asfiksia mekanike gjatë momentit të varrosjes, çka ngre dyshime të forta se fëmija mund të ketë qenë ende gjallë në atë çast. Po ashtu, janë konstatuar dëmtime në kokë, të cilat dyshohet se janë shkaktuar para vdekjes.

Trupi i vajzës u zbulua në mes të tetorit 2025, në gjendje të avancuar dekompozimi, ndërsa autoritetet besojnë se ajo kishte humbur jetën rreth tre javë më parë.

Rasti u bë publik pasi gjyshi i fëmijës raportoi zhdukjen e saj, ndërsa më herët shërbimet sociale kishin marrë sinjale për probleme në familje, përfshirë edhe denoncime për sjellje kërcënuese nga njerku. Gjatë hetimeve është zbuluar gjithashtu një mesazh audio, ku i dyshuari i drejtohej babait biologjik të vajzës duke pretenduar se ajo kishte vdekur dhe duke i kërkuar të ndërpriste kontaktet.

Të dy të arrestuarit përballen me akuza për vrasje të rëndë dhe fshehje të trupit të pajetë, ndërsa hetimet vijojnë për të sqaruar plotësisht rrethanat e ngjarjes. Gjykata ka caktuar një seancë të re për muajin maj, ku pritet të vijojë procesi gjyqësor për këtë rast që ka shkaktuar reagim të gjerë.