Kryetari i Preshevës: Plani evropian, thikë pas shpine për Luginën

Kryetari i Komunës së Preshevës, Shqipërim Arifi e konsideron planin evropian për normalizimin e marrëdhënieve mes Kosovës dhe Serbisë, një thikë pas shpine për shqiptarët në Luginë. Arifi u shpreh se në këtë plan nuk janë përmendur shqiptarët e Luginës. Sipas tij, kjo është një thikë pas shpine edhe për votuesit e kryeministrit të Kosovës, Albin Kurti, i cili më parë ka deklaruar se nuk do ta pranojë Asociacionin.

“Plani franko-gjerman, në mbështetje edhe të Kurtit, sepse ata në parim e kanë pranuar, Kurti e ka pranuar, është një thikë pas shpine për shqiptarët e Luginës së Preshevës, por është edhe një thikë pas shpine për çdo votues të Albin Kurtit. Në planin franko-gjerman është planifikuar vetëqeverisje e minoritetit serb. Në kontekst, kjo është thikë pas shpine për çdo votues dhe simpatizant të Vetëvendosjes. Kurse ne, në planin franko-gjerman nuk jemi permendur fare, nuk është fare as si fjalë parimi i reciprocitetit, për të cilën më së shumti ka folur Albin Kurti. Jemi të tradhtuar”, theksoi Arifi.