Politike

Berisha: Do depozitojmë në parlament ligjin për dyfishimin e rrogave

Sali Berisha vijon sulmet ndaj kreut të qeverisë Edi Rama duke thënë se premtimet për rritje të rrogës minimale janë vetëm propagandë. Teksa akuzon Ramën si ‘bandit’ e ‘njeri pa princip’, Berisha thotë se PD do të depozitojë së shpejti ligjin për dyfishimin e pagave që do të jetë i detyrueshëm për çdo institucion. Ndër të tjera thotë se Rama i bën premtimet në kohë zgjedhjesh ndërsa pretendon se asnjë vend i lirë s’bën rritje pagash pikërisht para votimit të qytetarëve.

“Garantoj qytetarët shqiptarë se jo dyfishimi i rrogave por mbidyfishimi, trefishimi i tyre do të jetë objektiv nr.1 i qeverisjes së PD por rritjet e rrogave në asnjë vend të lirë nuk bëhen kurrë para zgjedhjeve, votimit të qytetarëve. Ai që bën një akt të tillë është kriminel elektoral, bandit i vërtetë, mashtrues ordiner, njeri që nuk ka asnjë princip. Pagat e ulëta duhet të dyfishohen dhe ne i garantojmë të gjithë punonjësit se pagat në të gjithë sistemin e piramidës të administratës shtetërore do të dyfishohen por këto akte nuk ndërmerren kurrë në një vend demokratik para zgjedhjeve me qëllim për të ndikuar votën e qytetarëve.

Thirrja e tij për rritjen e rrogave të ulëta është demagogji pasi nuk bëhet me vullnet, është thirrje propagandistike, PD do të depozitojë në parlament ligjin për dyfishimin e rrogave si akt i parë. Ky ligj do të jetë i detyrueshëm për çdo institucion të këtij vendi, për çdo sipërmarrje, të dyfishojë rrogat e ulëta në Shqipëri”, tha Berisha.

Në vëmendje të Berishës në këtë deklaratë për mediat ishte edhe aplikacioni ‘Aktivisti’, për të cilin tha se është i dënueshëm dhe i bën thirrje punonjësve të administratës që të mos e përdorin. Berisha e cilëson si mjet terrori dhe thotë se PD do ndërmarrë hapat ligjorë për ta denoncuar.

“I bëj thirrje punonjësve të administratës të mos bëhen pjesë e përdorimit të aktivistit për mbështetje të pushtetit ë krimit. Aktivist është aplikacion i dënueshëm në ligjin kombëtar dhe ndërkombëtar. Është i dënueshëm në ligjin kombëtar se është dëshmi flagrante e shndërrimit të narkoshtetit të Edi Ramës.

Ai është në kundërshtim me ligjin ndërkombëtar. Po përdoret is mjet terrori mbi qytetarët shqiptarë, mbi zgjedhësit shqiptarë duke denoncuar para jush njoftoj se PD do të ndërmarrë të gjithë hapat ligjorë ndaj këtij instrumenti terrori si brenda vendit ashtu edhe në institucionet respektive, pranë rrjeteve sociale me të cilat përdoret ky aplikacion anti-ligjor”, tha Berisha.

Çfarë është aplikacioni Aktivisti
Së pari, bëhet fjalë për një aplikacion, një mjet komunikimi të ngritur nga Partia Socialiste si grupim politik. Pra një rrjet social i PS i cili mund të shkarkohet lehtësisht në aparatet telefonike nga çdo përdorues Androidi apo Iphone. Çdo zotërues i një aparati të tillë mund ta aksesojë këtë aplikacion duke vendosur vetë emrin që dëshiron si përdorues, madje edhe Berisha apo Meta vetë që sot shfaqen të shqetësuar mbi funksionalitetet e një aplikacioni të tillë. Njësoj si rrjeti social facebook apo Instagram, është përdoruesi ai që jep miratimin nëse të dhënat e tij, që janë emri dhe mbiemri, mund të regjistrohen në aplikacion. Pra është përdoruesi ai që jep pëlqimin për këtë informacion bazik. Në asnjë rast, aplikacioni nuk i kërkon përdoruesit asnjë të dhënë tjetër personale që cënon privatësinë e tij.

Çdo përdorues që regjistrohet dhe e akseson Appin, mund të zgjedhë lirisht se çfarë veprimesh ai dëshiron të ndërrmarë, të pëlqejë ose jo, të komentojë pozitivisht ose negativisht, mbi informacionet / lajmet që shfaqen në Aplikacion. Pra në këtë rrjet komunikimi mund të hyjë kushdo që kërkon të lexojë informacionet kryesore nga lidershipi, deputetët apo drejtuesit lokalë të partisë socialiste, apo nga aktualiteti i jetës publike, pa qenë detyrimisht anëtar apo militant i Partisë Socialiste. Në këtë kontekst, nuk ka asnjë arsye për ndonjë presion të mundshëm mbi administratën publike, e as ndonjë habi të madhe nëse një person, pjesë e administratës publike, mund të jetë edhe përdorues i aplikacionit.

Opozita pretendoi se pjesë e këtij aplikacioni janë shumë zyrtarë të organeve të drejtësisë, si gjyqtarë, prokurorë, duke iu referuar një liste përdoruesish të bërë publike. Në të vërtetë kjo listë nuk ezkiston, ajo është një fabrikim i mediave pranë opozitës, sepse aplikacioni nuk është një mekanizëm i dedikuar për administratën publike. Ndërsa emra të përveçëm që mediat e opozitës i përmendin si përdorues, ose mund të jenë vetë regjistruar duke shfaqur interes për informacion, ose emri i tyre si përdorues është thjesht një fabrikim i radhës për tu përdorur politikisht në tymnajën e ngritur nga opozita.

Politike

“Unë frikë nga burgu? Po më habisni”, Meta ‘e lëshon’ Kryemadhin: Përgjegjësia është individuale!

Prej kohësh po flitet për një masë sigurie që pritet të jepet ndaj Ilir Metës, mirëpo ai thotë se nuk ka asnjë stepje. I ftuar në A2 CNN, në Debat nga Alba Alishani, presidenti i Lirisë tha se nuk ka asnjë frikë nga burgu.

“Po ca burgu, unë frikë nga burgu, më habit. Shqiptarët më dinë dhe më njohin mua, ju duhet të kuptoni që përpjekja e tyre është për të frikësuar shqiptarët e ndershëm duke goditur politikisht Berishën, e godasin se ka dalë kundër ndarjes së Kosovës dhe projektet për shpopullimin e Shqipërisë. As nuk kam asnjë droje, Partia e Lirisë e ka zgjidhur me konventë lidershipit për 30 vitet që vijnë dhe çështjen e financimit, dhe Partia e Lirisë i përgjigjet kujdo atje ku e ka strofullën, këto mercenarë ca janë këto Dumanë, pas Rama. Liria ime është në dorën time, Rama dhe Dumani janë në burg sepse janë peng i gjërave që kanë bërë”, tha Meta.

Sa i përket Monika Kryemadhit e cila thirrur në SPAK për fshehje pasurie, Meta dha të njëjtën përgjigje si kryeministri Edi Rama “për mollat e kalbura që bien nga pema”. Sipas tij, përgjegjësia është personale.

“Përgjegjësia është personale për çdo person. Ai ka përgjegjësi se ka firmosur 17 vendime me kundërshtim me ligjin”, përfundoi Meta

Politike

Meta s’i ndahet Dumanit: Ai është kancelari i SPAK-ut që përcjell shkresat për llogari të Ramës

Presidenti i Partisë së Lirisë, Ilir Meta nuk dha një përgjigje të drejtpërdrejtë nëse është thirrur në SPAK, për dosjen CEZ-DIA. I ftuar në A2 CNN në Debat me Alba Alishani, Meta tha se është thirrur në Prokurorinë e Posaçme, “për qejf të Edi Ramës”.

“Unë kam qenë në SPAK shumë seriozisht, për një çështje qesharake. Edhe për Cez DIA nuk kam asnjë lidhje unë, jo ka qenë në 2019 kur kam qenë në kulmin e presioneve që të shkelja Kushtetutën. Unë atje jam thirrur për qejfin e Edi Ramës, por kam shkuar për të respektuar”, tha Meta.

Ndonëse nuk ka më një retorikë të ashpër, si “Dumdumani” apo “palaço”, Meta ka vijuar akuzat në drejtim të Altin Dumanit.

“Altin Dumani nuk është drejtuesi por fatkeqësisht kancelari i SPAK-ut, që thjesht përcjell shkresat për llogari të Edi Ramës. A është thirrur ndonjëherë Edi Rama nga SPAK-u? Edi Rama përgjegjësi kryesor për aferën e inceneratorëve nuk është thirrur asnjëherë nga SPAK. Erion Veliaj duhet të ishte arrestuar para 4 vitesh. Kjo tregon çdo gjë”, tha Meta.

Në këtë kuadër, tregon se nuk ka besim as te SPAK. Madje fakti që kryebashkiaku i Tiranës, Erion Veliaj është thirrur në SPAK për Inceneratorët për Metën është shumë vonë pasi do duhet të ishte arrestuar 4 vite më parë, pasi nuk ka asnjë incenerator. Gjithashtu, flet edhe për kërcënime për Arben Ahmetajn.

“Veliaj hëngri drekë në SPAK 7 orë, ça ka bërë atje, ai ka hedhur firma, ka rrëmbyer, uzurpruar kompetencat e këshillit Bashkiak, për gallatë atje. Mbi SPAK ka qenë Agaci dhe pastaj ai tjetri. (…)Nëse kërcënohet një zv kryeministër që tregon fakte të qarta se si u synua të mbyllej një dosje e tmerrshme si e inceneratorëve ku autorë janë Edi Rama dhe general Agaçi, dhe ky person flet dhe tregon pronarin e vërtetë të inceneratorëve, nëse pastaj dilet dhe thua që gjykatat bëjnë ç’a themi ne. Me 4 mbiemra gjyqtarja izolon Berishën, që është lideri i partisë kryesore opozitare, izolohet se Rama e ktheu kompleksin sportivë në kulla betonit”, përfundoi Meta

Politike

Meta i përgjigjet Braimllarit: Ma kishit bërë partinë si autobusi i Kuçit

Kreu i Partisë së Lirisë, Ilir Meta ishte i ftuar në Debat me Alba Alishanin ku foli për zhvillimet politike, mes të cilave dhe Konventën në partinë e tij që u mbajt pak ditë më parë, ku më herët ai i kishte shpallur luftë tradhtarëve dhe lidhjeve nepotike.

Ilir Meta deklaroi se nuk pati të shkarkuar nga Partia, por një ristrukturim, teksa shtoi se tashmë sipas statutit detyra janë të përcaktuara në vertikalitet.

“Kryetema ishin 5 prioritetet për miliona shqiptarë që ndalojnë shpopullimin dhe mbajnë të rinjtë këtu që të mos largohen për shkak të taksave. Meritokracia vendos në këtë forcë politikë. Ka qenë konventa më demokratike që ka ndodhur në Shqipëri. U çel me këngën “Për ty Atdhe” dhe u mbyll me “Ku ka si ty o Shqipëria ime”. Konventa kishte një çlirim energjish. Çfarë problemesh kishte Brahimllari. Nuk mund të ishte më nënkryetar pasi nuk ishte në statut. Kështu ndodhi dhe me Neshon dhe shumë të tjerë. Partia ka nevojë për drejtim të qartë, përgjegjësi të ndara, duhet një parti demokratike, të ketë fraksione. Por tani ka vertikalitet, presidenti është president dhe secili ka detyrën e tij. Nuk është shkarkuar askush. Dihej që nuk do të kishte më tradhtar. Nuk drejtohet partia si autobusi i Kuçit”, tha Meta.

Politike

“Luftë për mish të njomë”/ Berisha komenton deklaratën e Ramës për shpopullimin: Turp i shekullit

Kreu i PD-së Sali Berisha ka komentuar mbrëmjen e sotme deklaratën e kryeministrit Edi Rama të bërë gjatë takimit që mbajti një ditë më parë në Gjermani ku foli për shpopullimin. Rama e deklaroi largimin e të rinjve shqiptarë nga vendi si një “luftë për mish të njomë”, ndërsa u shpreh se shqiptarët janë të pëlqyer nga perëndimi pasi janë të bardhë.

Berisha e ka cilësuar këtë deklaratë si turpin e shekullit, ndërsa shton se Rama ka një përbuzje të madhe për qytetarët shqiptarë. Në fjalën e tij në tubimin qytetar Berisha përfundoi se 33 përqind e popullatës kanë braktisur këto 8 vitet e fundit Shqipërinë, nga keqqeverisja e Ramës.

“Këto zhvillime dramatike po rrokullisin kombin në honet e pasigurisë. Po bëjnë që shqiptarët të largohen pas sirianëve në luftë civile më shumë se të gjitha kombet e tjera nga vendi i tyre.Kreu i narkoshtetit, në aktin më cinik, më të turpshëm, deklaronte dje se fajin për këtë se ka Gjermania, pasi ju doni mish të freskët.

Urdhëroni të dashur qytetare dhe qytetarë, se çfarë koncepti ka ky për fëmijët tuaj, për vajzat tuaja, për djemtë tuaj. Një mish i freskët që shitet në Europë. A ka përbuzje më të madhe, përçmim më të madh? As Enver Hoxha, as Muamar Gadafi, as Asadi i Sirisë dhe asnjë njeri nuk zbret në këtë standard amoral. Të shpallë mish të freskët të rinjtë dhe të rejat që me politikat dhe vjedhjet që bën, i detyron të largohet nga vendi i tyre.

Miqtë e mi, në një vend të lirë, në një vend me ligj, qytetarët begatohen nga viti në vit.Po, liria sjell prosperitet. Liria sjell begati. Dhe në këtë Shqipëri dhe jo në ndonjë tjetër, gjer në vitin 2013, shqiptarët, ndonëse lëviznin, ndonëse kishte emigracion minimal, numri i tyre në Shqipëri, banorët në Shqipëri rriteshin nga viti në vit. Ndërsa sot, 33 përqind e popullatës kanë braktisur këto 8 vitet e fundit Shqipërinë. Dhe këta 1 milion e ca shqiptarë, Edi Rama që jeton për vete në saraje të ndërtuara me para të vjedhura, që jeton për vete mbi Tiranë në ajër të freskët, me kopsht 5 mijë metra, këta i quan mish i freskët. O turp i shekullit.O njeri i pashpirt.Po si të nxjerr ty goja një fjalë të tillë për të rinjtë shqiptarë, për fëmijët shqiptarë”,- tha Berisha.

Politike

Kreu i PL e uroi për fitoren/ Presidentja e RMV falënderon Metën në shqip, ja çfarë shkruan për integrimin

Presidentja e sapozgjedhur e Maqedonisë së Veriut, Gordana Sijlanovska Davkova ka falënderuar Presidentin e Partisë së Lirisë, Ilir Meta për urimin që ky i fundit i shprehu pas fitores.

Davkova ka shprehur falënderimin e saj ndaj Metës në gjuhën shqipe në rrjetin social “X”, duke vlerësuar përpjekjet për përmirësimin e marrëdhënieve mes dy vendeve.

Ajo shtoi se pret që me të njëjtin entuziazëm të vijojë udhëtimi i dy vendeve drejt integrimit të plotë evropian.

“I nderuar President Meta,
Faleminderit për urimet dhe përpjekjet Tuaja të sinqerta për përmirësimin e marrëdhënieve maqedono-shqiptare.
Pres që me të njëjtin entuziazëm të fortë të vazhdojmë udhëtimin e dy vendeve tona drejt integrimit të plotë evropian”, shkroi ajo në “X”.