‘Nuk kam porositur kulla’/ Basha: Bardhi sot flirton me atë që dje i thoshte vrasës

Kreu i Partisë Demokratike, Lulzim Basha ka reaguar pas akuzave të bëra ndaj tij sot në Kuvend. Basha mohoi akuzat e bëra nga Gazment Bardhit, teksa tha se nuk ka marrë asnjë kullë dhe asnjë kat.

Basha i quajti akuzat “pjesë e lojës së pisët dhe të vjetër të baltosjes”, ndërsa tha se Bardhi sot flirton me atë që dje i thoshte vrasës, duke i referuar Edi Ramës.

Reagimi i Lulzim Bashës:

Aleanca e kullave dhe e non gratave nuk do ta bëjë pis e as do ta mbajë peng Partinë Demokratike. Njerëzit e dinë mirë çfarë përfaqësojnë këta individë dhe interesave të kujt i shërbejnë. Janë të njëjtët që sot flirtojnë me atë të cilit dje i thoshin vrasës.

Sa për gënjeshtrat e fundit: Unë as nuk kam porositur kulla dhe as nuk kam marrë kate në asnjë kullë. Këto janë mashtrime të dëshpëruara, pjesë e lojës së pisët dhe të vjetër të baltosjes.

Ndërsa çështja McGonigal është kthyer në aktakuzën më të rëndë ndaj sulmeve të ulëta kundër meje prej Edi Ramës e Sali Berishë, si edhe prej kujtdo tjetër që po përdoret prej tyre. Se kush e shpëtoi Edi Ramën nga llogaridhënia për Kosovën, e pamë mirë në konferencën e djeshme të kryetarëve dhe në konsensusin për të ruajtur imazhin e Ramës.

Kaq në respekt të qytetarëve, sepse asgjë nuk pres nga ata që për hallet dhe karriket e tyre, duan të na shfokusojnë nga problemet e Shqipërisë dhe të shqiptarëve.

Ashtu si padrinoja non grata e humbi luftën e shpifjeve disa vjeçare, pasi koha e nxorri të vërtetën në dritë, edhe zëdhënësin e tij të radhës e pret i njëjti fat.