Gati për atentat, dënohet me 5 vite burg “ushtari” i Vis Martinajt

Gjykata e Lezhës, ka dënuar me 5 vite burgim për akuzën e “Mbajtjes pa lejë të armëve dhe Municioneve”, Nikoll Sherrnikun dhe Flutura Berishën.

Ata u arrestuan 17 Gushtin e vitit të kaluar, pasi sipas Policisë, po tentonin të kryenin një atentat. Sherrniku u kap në automjetin e blindur tip “Toyota” të parkuar në afërsi të një pallati në Kune të Shëngjinit, bashkë me drejtuesen e mjetit 34-vjeçarja, Flutura Berisha dhe një i mitur 15 vjeç. Policia iu sekuestroi një automatik me fishekë në fole gati për qitje, dy krehëra me fishekë, 2 radio marrëse – dhënëse si të Policisë, si dhe automjeti i blinduar me të cilin lëviznin këta shtetas.

Arrestimi i Sherrnikut ndodhi një muaj pas vrasjes së trefishtë të Briland Martinaj, Deklen Vata dhe Besmir Hoxha,ngjarje kjo e ndodhur në mbikalimin e Fushë-Krujës.

Por, ditën kur u arrestua, Nikoll Sherrniku theu dhe masën “arrest shtëpie” pasi akuzohej për një tjetër ngjarje kriminale. Ai ndodhej nën atë masë në lidhje me implikimin e tij në ngjarjen e ndodhur në dhjetor 2021, ku mbeti i vrarë me armë zjarri ish-punonjësi i Policisë, shtetasi Xhuliano Prela.

Mësohet se veç “Mbajtjes pa lejë të armëve dhe municionit”, Nikoll Sherrniku, është deklaruar fajtor dhe dënuar edhe për akuzën e ”Largimit nga vendi i caktimit nga gjykata për të qëndruar”. Gjykata e Lezhës e ka gjetur fajtor për akuzën e “Përkrahjes së autorit të krimit” dhe dënuar me 3 vjet e 4 muaj burgim për ngjarjen e vrasjes së punonjësit të policisë, Xhulio Prela.

Nikoll Sherrniku nga Fushë Kuqe e Kurbinit njihet dhe si anëtar i grupit të Ervis Martinajt dhe shok i ngushtë i nipit të vrarë të këtij të fundit, Brilant Martinajt.

Gjykata e Tiranës i ka caktuar atij masën “arrest me burg” dhe në lidhje me atentatin e regjistruar mbrëmjen e 12 Marsit ndaj lokalit të Fation Muratit, ku mbeti e vrarë aksidentalisht banakierja e lokalit Mimoza Paja.

Në lidhje me këtë ngjarje ai akuzohet për kryerjen e veprës penale “Sigurimi i kushteve dhe mjeteve materiale për të kryer vrasje”. Nga hetimet ka rezultuar se Nikoll Sherrniku ka marrë targat e huaja në shtetin gjerman, sjelljen e tyre në Shqipëri, dhe vënien në dispozinon të këtyre targave personave të tretë (autorëve), të cilët më pas i kanë ruajtur dhe përdorur këto targa në një automjet tip “BMW” seria 5, ditën e ngjarjes.

Nga hetimet ka rezultuar se targa gjermane “RE HX 112” ka hyrë në territorin shqiptar përmes pikës kufitare të Morinës nga Nikoll Sherrniku.

Burime pranë grupit hetimor bëjnë me dije se targat gjermane janë targa provizore të cilat i janë dhënë nga shteti gjerman Nikoll Shërnikut, pasi ky i fundit ka blerë një automjet në Gjermani.

Dhënia e targave provizore është bërë në mënyrë që Sherniku t’i përdorte ato deri në momentin e transportimit të makinës në Shqipëri ku do i nxirrte makinës targa të reja shqiptare. Makina dhe targat provizore në emër të Nikoll Shërnikut, janë futur në Shqipëri nga Kosova duke u shënuar në sistemin TIMS.

Por, për grupin hetimor Nikoll Sherrniku ka deklaruar se nuk ka asnjë dijeni në lidhje me atentatin e “Don Boskos”, pasi ai ka qenë në burg në atë kohë. Shërniku, ka pretenduar se targat i ka lënë në ambjentet e Drejtorisë së Transporteve në Lezhë, vend ku kishte targuar me targa Shqiptare makinën e blerë në Gjermani.

Policia dyshon se sulmi me armë ishte pjesë e një zinxhiri përplasjesh mes dy grupeve kriminale rivale, një version ky që po përforcohet edhe pas zbulimit së të pronësisë së targave të mjetit të përdorur në atentat.

Dyshohet se targat gjermane “RE HX 112”, Nikoll Sherrniku ia ka hequr automjet të tij dhe ia ka dhënë anëtarëve të një grupi kriminal që vepron në zonën e Laçit dhe Lezhës. Ky grup besohet se ka financuar dhe organizuar atentatin ndaj njerëzve të Fatjon Muratit, në shënjë hakmarje për vrasjen e Briland Martinaj,Diklen Vatës dhe Besmir Hoxhës.