Populisti dritëshkurtër/ Manovrat në veri i shërbejnë Albin Kurtit dhe jo Kosovës

Charles Kupchan, ish-drejtor i çështjeve evropiane në Këshillin e Sigurisë Kombëtare të SHBA-së, beson se veprimet e Qeverisë së Kosovës në veri të vendit, janë të motivuara nga politika e brendshme dhe theksoi se ato janë të rrezikshme për Kosovën. Sipas tij kryeministri Albin Kurti duhet të balancojë ushtrimin e sovranitetit me synimin për të normalizuar marrëdhëniet me Serbinë dhe për t’u bërë vend anëtar i BE-së dhe NATO-s.

“Unë mendoj se politike populiste e Kurti është dritëshkurtër, sepse minon mbështetjen e Kosovës në bashkësinë ndërkombëtare dhe nuk ndihmon për ta çuar përpara dialogun me Serbinë – përkundrazi, e kthen prapa. Këto janë gjeste dhe manovra në funksion të politikës së brendshme, të cilat mund të jenë të mira për fatin politik të Kurtit, por nuk janë të mira për Kosovën” – deklaroi Kupchan, duke shtuar se “Kosova dhe Serbia kanë zgjedhje të vështira për të bërë.

I pyetur nëse mund të ndodhë që SHBA dhe Unioni Europian ti kthejnë shpinën Kosovës, ai deklaroi se situate është  një pikë kthese në mbështetjen e Perëndimit për Kosovën. Por, është e rëndësishme që qytetarët e Kosovës të kenë parasysh faktin se po të mos ishin përpjekjet e Shteteve të Bashkuara, përpjekjet e NATO-s dhe të partnerëve evropianë të Amerikës, Kosova ndoshta nuk do ta gëzonte pavarësinë sot.

Sipas tij, hapat që po ndërmerr Kurti, nuk janë të paarsyeshëm nga këndvështrimi i ushtrimit të pushtetit Sovran dhe atë që po bën Prishtina, do ta bënte çdo qeveri sovrane. Por problemi është se Kosova nuk gjendet në një mjedis të qetë.

“Ajo gjendet në një mjedis të tensionuar, në një rajon të vështirë, në mes  negociatave shumë të vështira me Serbinë për njohjen e saj, për hyrjen e saj në bashkësinë ndërkombëtare të kombeve, si një vend që do të pranohej nga të gjithë. Në rrethana të tilla, unë mendoj se i takon udhëheqësit – kushdo qoftë ai – që të balancojë ushtrimin e sovranitetit, të të drejtave politike dhe ligjore me synimin për t’i normalizuar marrëdhëniet me Serbinë dhe për t’u bërë vend anëtar i BE-së dhe NATO-s” – theksoi Kupchan.