Bassuener: Dialogu i BE-së aktualisht shërben për të shmangur zgjidhjen e problemeve mes Kosovës e Serbisë

Kurt Bassuener, bashkëpunëtor i lartë në Këshillin për Politika të Demokratizimit (DPC), në një artikull autorial të botuar në “Financial Times” rreth politikës së jashtme të Bashkimit Evropian (BE) në Ballkanin Perëndimor, ka thënë se BE-ja ka devijuar nga qëllimi fillestar në dialogun mes Kosovës dhe Serbisë – njohja reciproke midis dy fqinjëve rajonalë.

“Duke u larguar nga qëllimi fillestar për të arritur njohjen e ndërsjellë ndërmjet Serbisë dhe Kosovës, si dhe duke shërbyer si mburojë për presidentin autoritar të Serbisë, Aleksandar Vuçiç, dialogu shërben si një shmangie nga zgjidhja e vërtetë e problemeve”, ka shkruar Bassuener

Bassuener ka nënvizuar ndër të tjera se duke qenë se shefja e ardhshme e politikës së jashtme të BE-së, Kaja Kallas, ka demonstruar lidership dhe vizion gjatë kohës sa ka qenë kryeministre e Estonisë, veçanërisht sa i përket agresionit të Rusisë kundër Ukrainës, ajo do ta udhëheqë gjithashtu BE-në drejt një rivendosjeje të politikave ndaj rajonit të Ballkanit Perëndimor.

Ndryshe, takimet e mbajtura së fundi në dialogun ndërmjet Kosovës dhe Serbisë nën ndërmjetësimin e BE-së, qoftë në nivel të lartë apo në nivel të kryenegociatorëve, nuk kanë prodhuar rezultate konkrete. Kosova dhe Serbia vazhdimisht fajësojnë njëra-tjetrën për moszbatimin e marrëveshjeve ekzistuese apo për dështimin dhe ngërçin në kuadër të procesit të dialogut.

Kosova dhe Serbia kanë arritur një marrëveshja për normalizimin e marrëdhënieve nën kujdesin e BE-së vitin e kaluar. Megjithatë, kjo marrëveshje nuk e përfshin njohjen reciproke mes dy shteteve, por kërkon nga të dyja që t’i pranojnë dokumentet dhe simbolet e njëra-tjetrës, përfshirë mes tjerash: pasaportat, diplomat, targat e veturave dhe vulat doganore.