Kurti refuzon t’i japë notë raportit me Ramën: Në kuptimin e vizionit të përbashkët, nuk kemi dallime

“Nuk mund ta bëj një kualifikim të tillë”, tha kryeministri i Kosovës, Albin Kurti, i pyetur se si janë raportet e tij me kryeministrin e Shqipërisë, Edi Rama, nga 1 deri në 10.

Kurti tha se në kuptimin e vizionit të përbashkët, ai nuk ka dallime me Ramën.

“Nuk mund ta bëj një kualifikim të tillë, por mund të them që kemi marrëdhënie të shkëlqyeshme midis dy qeverive. Kemi bërë tregun e përbashkët energjetik, kemi hapur 26 vendkalime të reja kufitare për 200 mijë banorët e zonës ndërmjet Kosovës dhe Shqipërisë, kemi mbajtur dy mbledhje të përbashkëta të qeverive me 58 marrëveshje të reja dhe gjithashtu po bëjmë bashkëfinancime në kulturë, në ekonomi e kështu me radhë, me ç’rast Kosova ka edhe dy zyra të veçanta doganore në Porto Romano dhe në Durrës. Do bëjmë edhe hekurudhën Prishtinë-Durrës. Në kuptimin e projekteve zhvillimore të planeve të punës, të vizionit të përbashkët, nuk kemi dallime, por duhet ta keni parasysh që aty ku pajtohemi, s’bëhet kurrë lajm” – KA DEKLARUAR KRYEMINISTRI

Kurti tha se ai rreth Ballkanit të Hapur, është dallimi mes tij dhe Ramës që “më së shumti është shpërdorur”.

“Unë besoj që dallimi i cili më së shumti është shpërdorur është ai rreth Ballkanit të Hapur, duke u përpjekur që atë dallim që kemi për çështjen e Ballkanit të Hapur ta vendosin në çdo çështje e në çdo temë në mënyrë të padrejtë” – theksoi Kurti