Motori përplas për vdekje të moshuarën, arrestohet drejtuesi

Një aksident ka ndodhur në aksin rrugor “Lezhë-Milot”, ku një motoçikletë ka përplasur për vdekje një 75-vjeçare.

Edhe pse e moshuara u dërgua me urgjencë në spital dhe pavarësisht ndihmës mjekësore, ka humbur jetën.

Policia bën me dije se shkaktari i aksidentit shtetasi Izedin Llukaçej u arrestua në flagrancë për veprën penale “Shkelja e rregullave të qarkullimit rrugor”, me pasojë vdekjen.

Njoftimi i policisë:

Paraditen e sotme, në aksin rrugor “Lezhë-Milot”, shtetasi I. Ll., 40 vjeç, banues në Shkodër, duke drejtuar motoçikletën, ka përplasur shtetasen Gj. Z., 75 vjeçe, banuese në Lezhë, këmbësore.

Shtetasja Gj. Z. u transportua në spital, por pavarësisht ndihmës mjekësore, ka humbur jetën.

Në përfundim të veprimeve të kryera nga grupi hetimor, drejtuesi i motoçikletës, shtetasi Izedin Llukaçej u arrestua në flagrancë për veprën penale “Shkelja e rregullave të qarkullimit rrugor”, me pasojë vdekjen.

Materialet procedurale do t’i kalojnë Prokurorisë pranë Gjykatës së Shkallës së Parë të Juridiksionit të Përgjithshëm Lezhë, për veprime të mëtejshme.