Juventus-i kërkon transferimin e përhershëm të Renato Veiga-s, Chelsea i tregon çmimin

Chelsea thuhet se është gati të shesë Renato Veiga-n për 30 milionë euro në verë, por Juventus-i do të preferonte një marrëveshje të re huazimi me një opsion blerje ose detyrim për ta blerë në vitin 2026.

“Calciomercato.com” raporton se Chelsea ka vendosur një çmim prej 30 milionë eurosh për mbrojtësin e tyre Veiga, i cili iu bashkua Juventus-it në formë huazimi në afatin kalimtar të janarit.

Mbrojtësi portugez ka bërë paraqitje bindëse si qendërmbrojtës nën drejtimin e Thiago Motta-s dhe sipas raportit, bardhezinjtë janë të gatshëm të zgjasin qëndrimin e tij të përkohshëm deri në qershor 2026.

Nga ana tjetër, Chelsea është i hapur për të diskutuar një transferim të përhershëm prej 30 milionë euro dhe negociatat mes dy klubeve pritet të fillojnë në javët e ardhshme.

Veiga është transferuar te Juventus-i në një marrëveshje huazimi të thatë, që do të thotë se bardhezinjtë nuk kanë një opsion për një lëvizje të përhershme në fund të sezonit.

“Tuttosport” raportoi më parë se David Hancko i Feyenoord-it ishte objektivi kryesor i mbrojtjes së bardhezinjëve për verën, por Veiga ishte një opsion i natyrshëm në rast se ata nuk arrinin një marrëveshje me klubin holandez.

Mbetet për t’u parë nëse Enzo Maresca do të pranonte të shiste Veiga-n, por sipas “Calciomercato.com”, konkurrenca për një vend titullari në mbrojtje në “Stamford Bridge” e ka bindur Chelsea-n të dëgjojë oferta me vlerë të paktën 30 milionë euro.

Veiga ka nisur katër ndeshje në Serie A për Juventus-in këtë sezon, tre në Serie A dhe një në UEFA Champions League.

Ai kishte shënuar dy gola dhe kishte dhënë një asistim në 18 paraqitje me Chelsea-n këtë sezon përpara se të bashkohej me Juventus-in.