Vendet arabe do t’i paraqesin Trump-it një plan për Gazën “brenda disa javësh”

Ministrat e jashtëm arabë po synojnë të udhëtojnë në Washington “brenda disa javësh” për t’i paraqitur presidentit të SHBA-ve Donald Trump një propozim “të fortë” për të rindërtuar Gazën pa zhvendosur popullsinë palestineze, thanë burimet zyrtare jordaneze për CNN.

Në fillim të këtij muaji, presidenti amerikan propozoi dëbimin e 2.1 milionë palestinezëve nga Gaza dhe transformimin e enklavës në një “rivierë” që do të zotërohej nga Shtetet e Bashkuara, një plan që shkaktoi zemërim në të gjithë Lindjen e Mesme dhe refuzime të prera nga liderët rajonalë.

Liderët arabë pritet të mblidhen për një samit më të gjerë në Cairo më 4 mars, ku pritet të publikohet një “hartë rrugore” për Gazën dhe konfliktin.

Më pas, diplomatët e lartë arabë pritet të udhëtojnë në kryeqytetin amerikan në javët në vijim për t’ia dorëzuar propozimin administratës Trump, thanë burimet.

Zyrtarët arabë duan të sigurohen se është “një plan solid” përpara se t’ia paraqesin Trump-it, tha një nga burimet.

Përveç paraqitjes së një plani për rindërtimin e brezit të shkatërruar pa zhvendosjen e popullsisë, kundërpropozimi arab do të trajtonte gjithashtu çështje kyçe si qeverisja e Gazës pas luftës, reformimi i Autoritetit Palestinez dhe vendosja e forcave paqeruajtëse ose paqësore brenda rripit, thanë burimet.

Javën e kaluar, liderët arabë mbajtën një takim të rrallë “joformal” në kryeqytetin saudit Riyadh për të diskutuar planin – një mbledhje që burimet thanë se ishte “i rëndësishëm” dhe në të cilin kishte “një qëndrim të unifikuar”.

Jordania dhe Egjipti – dy vende që Trump tha se ishin kandidatë për të pritur palestinezët – refuzojnë çdo zhvendosje dhe e konsiderojnë atë një çështje të sigurisë kombëtare.

Banka Botërore, Bashkimi Evropian dhe Kombet e Bashkuara thanë në një deklaratë të përbashkët javën e kaluar se, sipas vlerësimeve të tyre, vetëm kthimi i shërbimeve thelbësore, duke përfshirë shëndetin dhe arsimin, si dhe pastrimi i rrënojave, do të kërkonte tre vjet.

Rindërtimi i plotë i enklavës së shkatërruar do të kërkonte 10 vjet dhe do të kushtonte më shumë se 50 miliardë dollarë, vetëm banesat që vlerësohet se do të kushtojnë 15 miliardë dollarë.