Tragjedi në Maqedoninë e Veriut! Të paktën 51 persona të vdekur pas zjarrit në një klub nate, mbi 100 të plagosur në spitale

Të paktën 51 persona kanë vdekur në orët e vona të natës në qytetin lindor të Maqedonisë së Veriut, Koçan, si pasojë e shpërthimit të zjarrit në një klub nate.

Numri i të plagosurve deri më tani është mbi 118, ku një pjesë e tyre janë transferuar nga Koçani në klinikat në Shtip dhe Shkup.

Autoritetet ende nuk kanë treguar se si është përhapur zjarri dhe çfarë e ka shkaktuar atë.

Sipas mediave lokale, zjarri është përhapur nga mjetet piroteknike që janë përdorur gjatë një performance nga banda e famshme maqedonase DNA. Në kohën e shpërthimit dhe përhapjes së zjarrit, klubi ka qenë i mbushur me adoleshentë dhe të rinj.

Mediat lokale kanë thënë se pas shpërthimit të zjarrit, në vendin e ngjarjes kanë arritur zjarrfikësit, ambulanca dhe policët.

Deri më tani nuk ka informacion se ka shqiptarë të përfshirë në ngjarjen e rëndë.

Koçani ndodhet në pjesën lindore të Maqedonisë së Veriut dhe është rreth 62 milje në lindje të Shkupit, kryeqytetit. Regjistrimi i fundit i vitit 2021 tregoi se rreth 24,600 njerëz jetojnë atje.