Duke kërkuar bankomatin/ Kosova dorëzon në BE raportin për Planin e Rritjes

Qeveria në detyrë e Kosovës ka dorëzuar të martën në Bashkimin Evropian raportin e gjashtëmujorit të parë, i cili përmbledh progresin dhe zbatimin e reformave të parashikuara në kuadër të Planit të Rritjes për gjashtë vendet e Ballkanit Perëndimor.

Kjo është bërë e ditur përmes një komunikate për shtyp të Zyrës së Kryeministrit, në të cilën ka njoftuar për takimin që zëvendëskryeministri në detyrë i Kosovës, Besnik Bislimi, ka zhvilluar me dy deputetë gjermanë të mërkurën në Prishtinë.

Në fokus të diskutimeve, në bazë të njoftimit, ka qenë forcimi i bashkëpunimit dypalësh, synimi i Kosovës për marrjen e statusit të vendit kandidat për anëtarësim në BE dhe Plani i Rritjes, krahas aktualitetit politik në vend dhe situatën në rajon.

Kosova do të përfitojë rreth 882 milionë euro, të cilat do shërbejnë për zbatimin reformave dhe projekteve. Por, duke qenë se kjo marrëveshje ka karakter ndërkombëtar, ajo duhet të ratifikohet me dy të tretat e votave në Kuvendin e Kosovës.

Për shkak se Kosova nuk e ka ratifikuar ende “marrëveshjen për kredi” me BE-në, ajo nuk mund të përfitojë asnjë cent nga instrumenti i BE-së. Për momentin, perspektiva e Planit të Rritjes është e paqartë për shkak të ngërçit institucional në Kosovë.