Nuk humbas asnjë sekondë/ Vjosa nxjerr dufin: Hoti gënjeshtar, ja e zeza mbi të bardhë

Presidentja e Kosovës, Vjosa Osmani, e ka quajtur ish-kryeministrin Avdullah Hoti “personin më jorelevant”, duke shtuar se nuk dëshiron të humbë kohë për t’u marrë me deklaratat e tij.

E para e shtetit u shpreh se akuzat për moszbatim të marrëveshjeve ndaj Kosovës vijnë vetëm nga Serbia.

“Hoti është njëri nga personat më jorelevantë, me të cilin nuk dua të humb asnjë sekondë. Dua të theksoj se vetëm Serbia e akuzon Kosovën për moszbatim të marrëveshjes. A i keni lexuar këto marrëveshje? Cilin pjesë nuk e ka zbatuar Kosova?”, ka deklaruar Osmani në konferencë për media.

Sipas Osmanit, deklaratat për moszbatimin e Marrëveshjes së Uashingtonit janë “gënjeshtra”.

“Njerëzit mund të kenë inate politike, por jo deri në përmasa që të dëmtojnë interesin shtetëror duke gënjyer, sepse është gënjeshtër të akuzohet Kosova për moszbatim të marrëveshjeve. Jam e zeza mbi të bardhë”.

Hoti e kishte quajtur Osmanin, hipokrite për deklaratat e saj në lidhje me Marrëveshjen e Uashingtonit.

Në vlerësimin e tij, Osmani kohë më parë e kishte cilësuar këtë ujdi si ‘cenim të rendit kushtetues dhe rrezik për shtetin’, ndërsa tani – pas pesë vjetësh – e quan ‘marrëveshje të mirë’ dhe madje pretendon se ‘e kemi zbatuar’.

“Kjo është ajo që ndodh kur fitimi dhe mbajtja e pushtetit bëhen më të rëndësishëm se interesi shtetëror. Marrëveshja që dikur e luftonte për vota, sot shërben për lavdi të rreme”.

Sipas tij, Marrëveshja në fjalë nuk është zbatuar as nga ajo dhe as nga kryeministri në detyrë, Albin Kurti.

Osmani, në Shtetet e Bashkuara të Amerikës, kishte folur për rëndësinë e lidershipit amerikan për Evropën dhe Ballkanin Perëndimor, duke vlerësuar se Administrata e Donald Trump ka potencialin për të bërë gjëra të rëndësishme në raport me marrëdhëniet ndërmjet Kosovës dhe Serbisë.