NATO në alarm/ Një dron rus edhe në qiellin e Rumanisë, a po teston Moska durimin e Perëndimit?

Autoritetet rumune konfirmuan se një dron hyri në territorin e saj gjatë një sulmi ajror rus të shtunën mbrëma.

Ministria rumune e Mbrojtjes njoftoi se dy avionë luftarakë F-16 u ngritën urgjentisht për të monitoruar situatën. “Avionët zbuluan një dron në hapësirën ajrore kombëtare, i cili u ndoq deri sa u zhduk nga radari pranë fshatit Chilia Veche,” thuhet në deklaratën zyrtare.

Ngjarja ndodhi vetëm pak orë pasi Polonia raportoi ndërhyrje të ngjashme në afërsi të kufirit të saj lindor, duke ngritur nivelin më të lartë të alarmit për mbrojtjen ajrore dhe vendosur helikopterë e avionë në patrullime aktive. Edhe vendet aleate të NATO-s po marrin pjesë në operacionet mbrojtëse.

Zelenskyy: Rusia po zgjeron qëllimisht luftën – Duhet përgjigje e ashpër

Presidenti ukrainas Volodymyr Zelenskyy reagoi menjëherë pas incidenteve, duke paralajmëruar se Rusia po zgjeron qëllimisht operacionet me dronë edhe përtej kufijve ukrainas.

“Kjo është një përshkallëzim i qartë nga Rusia,” deklaroi ai. “Mos prisni që dhjetëra ‘Shahed’ dhe raketa balistike të godasin para se të veproni.”

Zelenskyy kërkoi sanksione të reja kundër Rusisë dhe një sistem të përbashkët të mbrojtjes nga NATO, duke theksuar se dronët rusë nuk po gabojnë rrugën – por po ndjekin objektiva të llogaritur saktësisht.

Trump: Sanksione ndaj Rusisë, por vetëm kur të veprojë e gjithë NATO

Në SHBA, Presidenti Donald Trump u shpreh se është gati të vendosë sanksione të forta ndaj Rusisë, por vetëm nëse të gjitha vendet e NATO-s bien dakord dhe ndalojnë blerjen e naftës ruse.

“Jam gati të veproj, por është koha që të gjithë ta bëjnë pjesën e tyre,” shkroi ai në një postim në rrjetet sociale.

Trump ka paralajmëruar më herët masa kundër Moskës, por shpesh pa i konkretizuar. Deklaratat e tij vijnë në një moment tensioni me Poloninë, e cila hodhi poshtë sugjerimin e Trump se shkelja e dronëve në hapësirën e saj mund të ketë qenë “aksidentale”.

Rusia goditet nga dronët ukrainas në thellësi të territorit

Ndërkohë, brenda territorit rus, një dron ukrainas goditi një nga rafineritë më të mëdha të naftës, pranë qytetit të Ufa-s, rreth 1,400 km larg vijës së frontit. Goditja shkaktoi zjarr dhe dëme të lehta, sipas kompanisë Bashneft, në pronësi të shtetit rus.

Një burim nga inteligjenca ushtarake ukrainase (GUR) mori përgjegjësinë për sulmin, duke vijuar me strategjinë e goditjes së infrastrukturës energjetike ruse për të dobësuar burimet financiare të Kremlinit.

NATO në vëmendje: Kufijtë e saj gjithnjë e më të ekspozuar

Rritja e incidenteve me dronë në hapësirën ajrore të vendeve të NATO-s, si Rumania dhe Polonia, ka ringjallur shqetësimet për përfshirjen indirekte të aleancës në konfliktin ruso-ukrainas.

Ndërsa Rusia mohon të ketë shënjestruar territorin polak apo rumun, vendet evropiane si Franca, Gjermania dhe Suedia kanë shtuar mbështetjen për mbrojtjen ajrore të Polonisë – një sinjal i qartë për unitet dhe gatishmëri brenda aleancës.