Fund i masakrës në Gaza/ Von der Leyen përshëndet planin e Trump: Është i mirë, BE është gati të kontribuojë

Presidentja e Komisionit Europian, Ursula von der Leyen, ka vlerësuar pozitivisht angazhimin e Presidentit amerikan Donald Trump për t’i dhënë fund luftës në Gaza, duke theksuar gatishmërinë e Bashkimit Europian për të kontribuar në këtë proces paqeje.

“Ne mirëpresim angazhimin e Presidentit Donald Trump për t’i dhënë fund luftës në Gaza. Inkurajojmë të gjitha palët ta shfrytëzojnë këtë mundësi. BE-ja është e gatshme të kontribuojë”, shkroi ajo në një postim në platformën X.

Von der Leyen theksoi se prioritet i menjëhershëm është ndalimi i armiqësive, dërgimi i ndihmës humanitare dhe lirimi i të gjithë pengjeve.
“Armiqësitë duhet të ndalen me ofrimin e menjëhershëm të ndihmës humanitare për popullin e Gazës dhe lirimin e menjëhershëm të të gjithë pengjeve”, shkroi ajo, ndërsa rikonfirmoi qëndrimin e Bashkimit Europian në favor të zgjidhjes me dy shtete, si mënyra e vetme për një paqe të qëndrueshme në rajon.

“Një zgjidhje me dy shtete mbetet e vetmja rrugë e qëndrueshme për një paqe të drejtë dhe të qëndrueshme në Lindjen e Mesme, me popujt izraelitë dhe palestinezë që jetojnë krah për krah, në paqe dhe siguri”, përfundoi von der Leyen.