LUFTA E SHBA NE IRAN, NJE PJATE ME ILUZIONE

Negociatat mes Shteteve të Bashkuara dhe Iranit po përqendrohen në dy çështje kryesore: programin e pasurimit bërthamor dhe sasinë e uraniumit të pasuruar që ndodhet ende në struktura të nëndheshme në Isfahan, të cilat më herët janë goditur nga sulme ajrore amerikane.

Sipas korrespondentit të sigurisë të BBC-së, Frank Gardner, çështja mbetet jashtëzakonisht e ndjeshme dhe çdo operacion për hyrje në këto tunele do të ishte i pamundur pa miratimin e Iranit. Edhe Agjencia Ndërkombëtare për Energjinë Atomike (IAEA) është e gatshme të marrë pjesë në verifikime, por vetëm në kushte sigurie dhe jo nën rrezik të drejtpërdrejtë.

Teherani, ndërkohë, kërkon heqjen e sanksioneve ekonomike, në një moment kur ekonomia e vendit përballet me presion të rëndë dhe eksportet janë të kufizuara për shkak të situatës në portet e Gjirit Persik.

Raportimet nga monitorimi i trafikut detar tregojnë se nuk ka anije që po kalojnë aktualisht nëpër Ngushticën e Hormuzit, një nga korridoret më strategjike të transportit të naftës në botë.

Shumë anije janë ankoruar pranë brigjeve të Omanit dhe Emirateve të Bashkuara Arabe, ndërsa qarkullimi është ngadalësuar ndjeshëm pas njoftimit të Teheranit për mbylljen e rrugës detare.

Situata është shoqëruar me incidente të raportuara në det, përfshirë goditje me predha ndaj disa mjeteve lundruese dhe sulme të raportuara nga anije iraniane ndaj një tanker-i.

Sipas raportimeve nga Teherani, përpjekjet diplomatike vazhdojnë në mënyrë të heshtur, me ndërmjetës që shkëmbejnë mesazhe mes palëve.

Megjithatë, nuk ka shenja të qarta për një marrëveshje të afërt apo për zgjatjen e armëpushimit aktual.

Korrespondentët theksojnë se afati i armëpushimit është i shkurtër dhe pasiguria mbetet e lartë.

Në një zhvillim paralel, Forcat e Mbrojtjes së Izraelit (IDF) deklaruan se kanë goditur mbi 150 anëtarë të Hezbollahut brenda 24 orëve përpara hyrjes në fuqi të një mirëkuptimi për armëpushim.

Sipas IDF, janë shënjestruar rreth 300 objektiva ushtarake në Liban, përfshirë qendra komanduese dhe depo armësh, ndërsa disa komandantë të lartë të Hezbollahut janë vrare.

Izraeli thotë se operacionet do të vazhdojnë për sa kohë që ekziston rrezik për civilët dhe forcat e tij.

Në tërësi, situata në Lindjen e Mesme mbetet e tensionuar në disa fronte njëkohësisht: diplomaci e brishtë me Iranin, rrezik për bllokim të një rruge globale energjetike dhe rrezik përshkallëzimi ushtarak në Liban, pavarësisht armëpushimit.