TAP ‘heq tapën’, fillon projektin që sjell 10 miliardë metra kub gaz në Fier

Konsorciumi Trans Adriatic Pipeline (TAP) AG ka nisur fazën e zbatimit të projektit për pikën e daljes së gazit në Fier, duke shfrytëzuar infrastrukturën ekzistuese të instaluar gjatë ndërtimit të gazsjellësit, pranë stacionit të kompresimit ACS03.
Sipas konsorciumit të cituar nga mediat azere, projekti parashikon ndërtimin e një objekti për matjen e gazit dhe reduktimin e presionit, i cili do të vendoset pranë këtij stacioni dhe do të shërbejë për furnizimin e një gazsjellësi të ardhshëm në territorin shqiptar.
Kontrata për inxhinierinë, prokurimin dhe ndërtimin (EPC) është dhënë gjatë vitit 2025, ndërsa aktualisht po zhvillohen fazat e inxhinierisë dhe prokurimit. Punimet në terren pritet të nisin në mesin e vitit 2026, me përfundimin e projektit të planifikuar për tremujorin e katërt të vitit 2027.
Sipas TAP AG, pika e daljes në Fier përfaqëson një investim prej disa milionë eurosh dhe, pas përfundimit, do t’i dorëzohet qeverisë shqiptare.
Ky projekt konsiderohet një element kyç për përpjekjet e Shqipërisë drejt gazifikimit, duke mbështetur zhvillimin gradual të infrastrukturës së gazit dhe rritjen e qasjes në gaz natyror.
Ai pritet të mundësojë lidhjen e vendit me rrjedhat rajonale të gazit dhe të forcojë ndërveprimin energjetik në Evropën Juglindore, ndërsa konsorciumi thekson angazhimin për të mbështetur zhvillimin ekonomik dhe tranzicionin drejt një të ardhmeje energjetike më të sigurt dhe të qëndrueshme.
Trans Adriatic Pipeline përbën segmentin evropian të Korridorit Jugor të Gazit, duke transportuar gaz natyror nga fusha Shah Deniz në Detin Kaspik drejt tregjeve evropiane.
Me një gjatësi prej rreth 878 kilometrash, gazsjellësi lidhet me Trans Anatolian Natural Gas Pipeline (TANAP) në kufirin mes Greqisë dhe Turqisë, përshkon Shqipërinë, kalon nën Detin Adriatik dhe del në sipërfaqe në jug të Italisë.

Kapaciteti fillestar i transportit është rreth 10 miliardë metra kub gaz në vit, me potencial zgjerimi deri në 20 miliardë metra kub, në varësi të kërkesës së tregut dhe miratimeve rregullatore.