Merkel: BE-ja duhet të kishte më shumë dialog me Rusinë, Merz: Shpresa të rreme

Teksa po shtohet presioni mbi Evropën për të emëruar një të dërguar të posaçëm për bisedimet e paqes midis Rusisë dhe Ukrainës, ish-kancelarja gjermane Angela Merkel ka kritikuar ashpër BE-në për mospërdorimin e ndikimit të saj diplomatik për të ndihmuar në përfundimin e pushtimit në shkallë të plotë të Ukrainës nga Rusia.

Në një intervistë për transmetuesin publik WDR, Merkel deklaroi se Europa duhet ta përdorë më tepër potencialin e saj diplomatik.

“Mendoj se mbështetja ushtarake që kemi ofruar deri më tani është absolutisht gjëja e duhur për t’u bërë. Gjithashtu mendoj se është e drejtë që të bëjmë shumë më tepër për të krijuar një efekt parandalues ​​përtej mbështetjes sonë për Ukrainën. Ajo që më vjen keq është se, sipas mendimit tim, Evropa nuk po e përdor mjaftueshëm potencialin e saj diplomatik. Nuk mjafton që Presidenti i SHBA-së Donald Trump të mbajë kontakte me Rusinë”, tha Merkel gjatë një interviste me transmetuesin publik WDR.

Si Moska ashtu edhe Kievi kanë sinjalizuar hapje ndaj një ndërmjetësi të tillë në një kohë kur ekipi negociator i Trump është përqendruar drejtpërdrejt në luftën SHBA-Izrael me Iranin.

Kancelari gjerman Friedrich Merz, tha të hënën se emërimi i një negociatori që flet në emër të të gjithë bllokut “nuk është planifikuar aktualisht”, ndërsa shtoi se diskutimet mbi këtë çështje po vazhdojnë në nivel evropian, si dhe në një format më të vogël me Francën dhe Mbretërinë e Bashkuar. Ai paralajmëroi gjithashtu për shpresa të rreme.

Merkel, e cila shërbeu si kancelare e Gjermanisë nga viti 2005 deri në vitin 2021, tha se kishte propozuar krijimin e një formati diplomatik midis BE-së dhe Rusisë gjatë takimit të saj të fundit të Këshillit Evropian në tetor 2021 në fund të mandatit të saj, katër muaj para se të fillonte lufta e plotë e Rusisë kundër Ukrainës. Por ajo shtoi se kjo kishte dështuar për shkak të opinioneve të ndryshme brenda bllokut se si të merrej më mirë me Moskën.

“Duhet të vazhdosh të punosh për këtë derisa të arrish një qëndrim të përbashkët. Diplomacia ka qenë gjithmonë ana tjetër e medaljes, edhe gjatë Luftës së Ftohtë”, tha ajo për këto dallime.

Trashëgimia e Merkelit është vënë nën shqyrtim vitet e fundit për shkak të varësisë në rritje të Gjermanisë nga gazi rus gjatë mandatit të saj, me kritika në rritje që kur Moska sulmoi Ukrainën në vitin 2022.

Por përvoja e saj e kaluar në negociata me presidentin rus Vladimir Putin dhe presidentin ukrainas Volodymyr Zelensky ka bërë që emri i Merkelit të përflitet si një nga kandidatet e mundshme për t’u bërë e dërguara e paqes e BE-së për të ndihmuar në zgjidhjen e konfliktit.

Megjithatë, Merkel tha se zyra e saj nuk kishte marrë asnjë kërkesë zyrtare për këtë qëllim. Politikania e qendrës së djathtë theksoi gjithashtu se besonte se vetëm ata që mbajnë pushtetin janë negociatorë të besueshëm, duke përmendur përvojat e saj me Putinin pas aneksimit të paligjshëm të Krimesë në vitin 2014.

“Ne ishim në gjendje t’i zhvillonim ato negociata vetëm me Presidentin Putin sepse kishim pushtet politik, sepse ishim krerët e qeverive. Keni nevojë për atë pushtet. Dhe unë, personalisht, nuk do ta kisha menduar kurrë të kërkoja një ndërmjetësues që të shkonte në Minsk për mua dhe të fliste me Putinin…Duhet ta merrni këtë në duart tuaja”, tha Merkel.

Marrëveshjet e Minskut, të ndërmjetësuara nga Merkel dhe homologu i saj francez në vitet 2014 dhe 2015 për të ndaluar luftimet në Ukrainën lindore, nuk arritën të siguronin një armëpushim të qëndrueshëm. Shkeljet vazhduan për vite me radhë përpara se Rusia të niste luftën e saj totale.