PUTIN PRANON VETEM MACRON PER BISEDIME

Ditet e fundit u zhvillua një telefonatë mes presidentit bjellorus Alexander Lukashenko dhe presidentit francez Emmanuel Macron e cila është fokusuar kryesisht te lufta në Ukrainë, mundësitë për dialog me Moskën dhe roli që mund të luajnë udhëheqësit evropianë në përpjekjet diplomatike.
Sipas informacioneve të publikuara nga agjencia shtetërore bjelloruse BelTA, Lukashenko i ka kërkuar Macronit të marrë një rol më të drejtpërdrejtë në komunikimin me Kremlinin dhe të angazhohet për zgjidhjen e konfliktit përmes bisedimeve. Kreu i shtetit bjellorus e ka paraqitur presidentin francez si një nga figurat më me përvojë në politikën evropiane dhe si një prej liderëve që mund të ndikojnë në hapjen e një kanali dialogu me Rusinë.
Gjatë bisedës, Lukashenko ka argumentuar se Macron, për shkak të kohës së gjatë në krye të Francës dhe peshës së tij politike në Evropë, duhet të marrë iniciativën për të afruar palët. Ai ka sugjeruar që presidenti francez të zhvillojë kontakte të drejtpërdrejta jo vetëm me Moskën, por edhe me Minskun, me synimin për të diskutuar rrugët e mundshme të zgjidhjes së konfliktit.
Presidenti bjellorus ka komentuar edhe mundësinë që liderë të tjerë evropianë të marrin përsipër një rol të tillë. Sipas tij, kancelari gjerman Friedrich Merz dhe kryeministri britanik Keir Starmer janë ende figura relativisht të reja në skenën politike. Ai ka përmendur gjithashtu kryeministren italiane Giorgia Meloni, duke lënë të kuptohet se nuk e konsideron atë si zgjedhjen e duhur për të mbajtur barrën e një ndërmjetësimi kaq kompleks.
“Në Itali ka një kryeministre grua. Çfarë, doni vërtet t’ia besoni këto detyra një gruaje?”, u shpreh presidenti bjellorus, në komente që pritet të ngjallin polemika në arenën politike evropiane.
Një pjesë e rëndësishme e telefonatës ka qenë edhe çështja e përfshirjes së mundshme të Bjellorusisë në luftën në Ukrainë. Lukashenko ka deklaruar se i ka sqaruar Macronit se Minsku nuk ka plane për të hyrë në konflikt ushtarak.
Sipas tij, presidenti francez kishte ngritur shqetësime lidhur me raportimet që flasin për një rol më aktiv të Bjellorusisë në luftë, por ai i ka hedhur poshtë këto skenarë.
Në këtë kontekst është diskutuar edhe tema e armëve bërthamore dhe stërvitjeve të përbashkëta ruso-bjelloruse. Lukashenko ka përsëritur qëndrimin e tij se armët bërthamore do të përdoren vetëm në rast se Bjellorusia përballet me një agresion të drejtpërdrejtë.
Biseda ka prekur edhe mundësinë e një sulmi nga veriu ndaj Ukrainës dhe pasojat që do të sillte një zhvillim i tillë. Sipas versionit të paraqitur nga presidenti bjellorus, Macron ka paralajmëruar se një veprim i tillë do të sillte reagim nga pala ukrainase dhe aleatët e saj. Nga ana tjetër, Lukashenko ka insistuar se prioritet duhet të mbetet puna për paqen dhe jo përshkallëzimi i konfliktit.
Ai ka kujtuar gjithashtu samitin e Komunitetit Politik Evropian të zhvilluar në Jerevan, duke argumentuar se takime të drejtpërdrejta me pjesëmarrjen e liderëve rusë, bjellorusë dhe francezë mund të kishin krijuar një mundësi për dialog më të gjerë. Sipas tij, një takim i tillë mund të zhvillohej në Minsk, me pjesëmarrjen edhe të presidentit rus Vladimir Putin.
Në fund të deklaratave të tij, Lukashenko ka lënë të kuptohet se Macron nuk e ka përjashtuar mundësinë e kontakteve të mëtejshme me Moskën, ndërsa ka theksuar se rruga e vetme për zbutjen e tensioneve mbetet komunikimi i drejtpërdrejtë mes palëve.