Armëpushimi i Izraelit me Hezbollahun, kërcënon Netanyahu: Nëse nuk respektohet do nisim sulmet

Kryeministri izraelit Benjamin Netanyahu ka paralajmëruar se Izraeli është gati të godasë objektiva në Bejrut nëse Hezbollahu nuk ndalon menjëherë sulmet ndaj qyteteve dhe civilëve izraelitë.

Në një postim në platformën X, Netanyahu njoftoi se ka folur me Presidentin amerikan Donald Trump dhe i ka transmetuar këtë mesazh të qartë.

“Nëse Hezbollahu nuk ndalon sulmet, Forcat e Mbrojtjes të Izraelit (IDF) do të sulmojnë objektiva në Bejrut”, thuhet në deklaratën e tij.

Netanyahu shtoi se operacioni izraelit në Libanin jugor do të vazhdojë sipas planit të paracaktuar dhe se qëndrimi i Izraelit mbetet i pandryshuar: ndalimi i plotë i sulmeve nga Hezbollahu është kusht i domosdoshëm për çdo qetësim të situatës.

Ambasada e Libanit në Uashington ka deklaruar se Netanyahu kishte rënë dakord për një propozim që parashikon ndërprerje reciproke të sulmeve midis Izraelit dhe Hezbollahut.

Sulmet ndërmjet Izraelit dhe Hezbollahut kanë vazhduar me intensitet të ndryshëm që nga tetori 2023, pas sulmit të Hamasit më 7 tetor. Hezbollahu, i cili mbështetet nga Irani, ka kryer sulme me raketa dhe dronë ndaj zonave veriore të Izraelit, duke detyruar mijëra izraelitë të evakuohen. Nga ana tjetër, Izraeli ka kryer operacione të gjera ajrore dhe tokësore në Libanin jugor, duke synuar infrastrukturën ushtarake të Hezbollahut.