AMERIKA GODET IRANIN, RRITET ÇMIMI I NAFTES

Forcat amerikane dhe ato iraniane kanë vijuar shkëmbimin e sulmeve për të dytën ditë radhazi, duke rritur shqetësimet për një përshkallëzim më të gjerë të konfliktit në Lindjen e Mesme.
Komanda Qendrore e Shteteve të Bashkuara (CENTCOM) njoftoi se ka përfunduar valën më të fundit të sulmeve kundër objektivave në Iran. Sipas deklaratës zyrtare, goditjet kishin në shënjestër kapacitetet iraniane të mbikëqyrjes ushtarake, sistemet e komunikimit dhe pozicionet e mbrojtjes ajrore.
Gjatë orëve të para të së enjtes, shpërthime dhe aktivitet i mbrojtjes ajrore u raportuan në disa zona të Iranit jugor. Raportimet më të shumta vinin nga provinca Hormozgan, përgjatë bregdetit jugor të vendit, ku mediat shtetërore iraniane raportuan shpërthime në Sirik, Minab dhe Bandar Abbas, një qytet-port me rëndësi strategjike për ushtrinë dhe marinën iraniane.
Ndërkohë, në Asaluyeh u raportua aktivitet i mbrojtjes ajrore dhe një ndërhyrje e mundshme ndaj raketave, megjithëse autoritetet iraniane mohuan çdo sulm ndaj fushës së gazit South Pars dhe infrastrukturës energjetike përreth.
Komandanti i forcave ajrore të Gardës Revolucionare Islamike, gjeneralmajor Majid Mousavi, paralajmëroi për pasoja të rënda në rajon.
“Po e bëni të pasigurt Ngushticën e Hormuzit? Ne do ta kthejmë të gjithë rajonin në ferr nga territori iranian. Kjo është përgjigjja ndaj agresionit amerikan në rajon”, deklaroi ai përmes agjencisë shtetërore IRNA.
Banorët e qytetit Karaj, rreth 30 kilometra në jugperëndim të Teheranit, raportuan shpërthime të fuqishme gjatë natës. Zona strehon baza ushtarake dhe objekte të prodhimit të raketave.
Nga ana tjetër, Garda Revolucionare iraniane pretendoi se ka kryer dy valë sulmesh kundër 18 objektivave të forcave amerikane në bazat ajrore Ali Al-Salem dhe Ahmad Al-Jaber në Kuvajt, si dhe në bazën Sheikh Isa në Bahrejn.
Sipas IRNA-s, objektivat janë “goditur dhe shkatërruar”, megjithëse pretendimi nuk është verifikuar në mënyrë të pavarur dhe nuk ka pasur konfirmim të menjëhershëm nga autoritetet amerikane, kuvajtiane apo bahrejnase.
Sipas gazetarit të Fox News, Trey Yingst, presidenti Donald Trump i ka thënë se Shtetet e Bashkuara kanë lëshuar 49 raketa Tomahawk kundër objektivave iraniane, krahas bombardimeve nga avionët luftarakë.
Trump thuhet të ketë paralajmëruar se sulmet mund të rifillojnë gjatë natës nëse Irani nuk tregon gatishmëri në negociata.
Në të njëjtën kohë, pas njoftimit për mbylljen e Ngushticës së Hormuzit, marina e Gardës Revolucionare paralajmëroi anijet në Gjirin Persik dhe Detin e Omanit të mos lëvizin, duke deklaruar se çdo afrim drejt ngushticës do të konsiderohet bashkëpunim me armikun.
Sekretari amerikan i Mbrojtjes, Pete Hegseth, duke folur nga selia e Komandës Qendrore në Tampa të Floridës, shmangu një përgjigje të drejtpërdrejtë mbi mundësinë e goditjes së infrastrukturës civile iraniane.
“Ne do t’i godasim fort, sipas kushteve tona”, tha ai.
Sulmet më të fundit pasojnë përplasjet e ditëve të fundit mes dy vendeve, të cilat u intensifikuan pasi Irani rrëzoi të hënën një helikopter luftarak Apache të ushtrisë amerikane.