Pacolli ngre akuza pas rikthimit në kantier: Janë zhdukur pajisjet, SPAK të nisë hetimet

Mes përplasjeve dhe tensioneve, punonjësit e kompanisë MABCO dhe nënkontraktorët e saj arritën të futen këtë të hënë në ambientet e Aeroportit të Vlorës për të rifilluar punimet, pas disa muajsh ndërprerjeje.

Mirëpo përmes një postimi në rrjetet sociale, biznesmeni Behgjet Pacolli ka bërë me dije se gjendja në të cilën është gjetur kantieri është shqetësuese. Sipas tij, gjatë inspektimit janë konstatuar dëmtime në një sërë pajisjesh dhe infrastrukturash të rëndësishme të terminalit, përfshirë monitorët informues, dyert automatike, panelet, sinjalistikën, kuadrot elektrike, gjeneratorët dhe pajisje të tjera teknike. Po ashtu, sipas tij mungojnë edhe vegla pune, materiale dhe pajisje në pronësi të kompanisë dhe nënkontraktorëve.

“Megjithatë, ajo që u konstatua gjatë inspektimit të objektit është tronditëse, e dhimbshme dhe krejtësisht e papranueshme. Një vepër e ndërtuar me vite pune, përkushtimi, sakrificash të panumërta dhe investimesh shumë të mëdha financiare është gjetur rëndë e dëmtuar, e keqpërdorur dhe e ekspozuar ndaj akteve të vandalizmit, huliganizmit dhe vjedhjes.

Janë konstatuar dëmtime serioze në materiale dhe pajisje, përfshirë monitorët informues, dyert, dyert automatike, pllakat, panelet, sinjalistikën, kuadrot elektrike, gjeneratorët e energjisë dhe pajisje të tjera të rëndësisë kritike. Për më tepër, një numër veglash, pajisjesh dhe materialesh në pronësi të Mabco-s dhe nënkontraktorëve të saj rezultojnë të jenë zhdukur”, shkruan Pacolli duke pretenduar më tej se dëmtimet nuk janë vetëm materiale, por kanë sjellë pasoja edhe në funksionimin e sistemeve teknike të Aeroportit.

Sipas tij mungesa e mirëmbajtjes dhe kushtet e papërshtatshme gjatë periudhës së ndërprerjes kanë shkaktuar probleme në sistemet mekanike dhe elektrike, duke rritur kostot dhe kohën e nevojshme për përfundimin e Aeroportit.

Në fund të këtij reagimi, Pacollii i ka bërë thirrje Prokurorisë së Posaçme kundër Korrupsionit dhe Krimit të Organizuar që të nisë menjëherë hetimet e plota për ngjarjet e ndodhura në Aeroportin e Vlorës, me qëllim identifikimin e autorëve, organizatorëve dhe zbardhjen e shkaqeve që çuan në dëmtimin e pronës dhe bllokimin e punimeve për javë të tëra.

Reagimi i plotë i Behgjet Pacollit:

Sot pas 5 javësh nga sekuestrimi i paligjshëm dhe i dhunshëm i objektit të Terminalit dhe godinave përcjellëse, nga grupe të caktuara kriminale, që po tentojnë të përvetësojnë në mënyrë huliganeske dhë të kundërligjshme VIA-n – një shoqëri ku Mabco zotëron 98% të aksioneve – Mabco arriti të rikthehet në kantier për të vijuar dhe përfunduar punimet, në zbatim të vendimeve të Asamblesë së Ortakëve, vendimit të Gjykatës së Lartë, si dhe kërkesës së Ministrisë së Infrastrukturës dhe Energjisë dhe Kryeministrit të Shqipërisë.

Megjithatë, ajo që u konstatua gjatë inspektimit të objektit është tronditëse, e dhimbshme dhe krejtësisht e papranueshme. Një vepër e ndërtuar me vite pune, përkushtimi, sakrificash të panumërta dhe investimesh shumë të mëdha financiare është gjetur rëndë e dëmtuar, e keqpërdorur dhe e ekspozuar ndaj akteve të vandalizmit, huliganizmit dhe vjedhjes.

Janë konstatuar dëmtime serioze në materiale dhe pajisje, përfshirë monitorët informues, dyert, dyert automatike, pllakat, panelet, sinjalistikën, kuadrot elektrike, gjeneratorët e energjisë dhe pajisje të tjera të rëndësisë kritike. Për më tepër, një numër veglash, pajisjesh dhe materialesh në pronësi të Mabco-s dhe nënkontraktorëve të saj rezultojnë të jenë zhdukur.

Këto nuk janë thjesht dëme materiale. Këto janë akte të qëllimshme që përbëjnë një sulm të drejtpërdrejtë ndaj mundit, punës së ndershme dhe përpjekjeve të qindra profesionistëve që kanë kontribuar në realizimin e këtij projekti strategjik. Çdo monitor i shkatërruar, çdo derë e dëmtuar dhe çdo pajisje e vjedhur përfaqëson jo vetëm një humbje financiare, por edhe një mungesë të thellë respekti ndaj punës, sakrificës dhe investimit të bërë ndër vite.

Huliganizmi nuk ka ndalur me kaq. Vandalizmi i qëllimshëm ndaj objektit ka shkaktuar pasoja të mëtejshme. Për shkak të temperaturave të larta, mungesës së qarkullimit të ajrit dhe mosfunksionimit të kushteve minimale teknike, janë dëmtuar sisteme mekanike, elektrike dhe grupet gjeneruese, duke rritur ndjeshëm kostot dhe kohën e nevojshme për rikuperimin e dëmeve.

Është e dhimbshme të shohësh se si një aset strategjik kombëtar, i ndërtuar me aq mund, përkushtim dhe investime të jashtëzakonshme, është lënë të shkatërrohet nga njerëz pa skrupuj, të cilët me veprimet e tyre kanë dëshmuar se synimi i tyre nuk ka qenë zhvillimi i projektit, por pengimi i tij. Këto veprime ngjallin dyshime serioze se shkatërrimi i qëllimshëm i pronës ka pasur për qëllim jo vetëm ndalimin e punimeve, por edhe fshehjen e veprimeve dhe pasojave që sot po dalin në dritë.

Vandalizmi, vjedhja dhe shkatërrimi i pronës nuk dëmtojnë vetëm Mabco-n. Ato dëmtojnë interesin publik, zhvillimin ekonomik, besimin e investitorëve dhe të ardhmen e një projekti me rëndësi të veçantë kombëtare.

Edhe një herë u bëjmë thirrje organeve kompetente dhe SPAK.ut që të fillojnë pa vonesë hetime të thella, serioze dhe të pandikuara nga askush. Autorët e këtyre veprimeve, organizatorët dhe nxitësit e tyre duhet të mbajnë përgjegjësi të plotë ligjore për dëmet e shkaktuara. Publiku meriton të dijë jo vetëm kush i kreu këto akte, por edhe cili ishte SHKAKU  dhe arsyeja e vërtetë e këtij vandalizmi të ushtruar për javë të tëra para syve të institucioneve përgjegjëse për ruajtjen e rendit dhe ligjit.

Mabco nuk do të ndalet. Pavarësisht pengesave, dëmtimeve dhe përpjekjeve dashakeqe për të sabotuar, përvetësuar apo shkatërruar këtë investim, puna do të vazhdojë. Aeroporti do të përfundojë dhe do t’u shërbejë qytetarëve, sepse as vandalizmi, as hajnia, as presioni dhe as interesat e ngushta nuk mund të jenë më të forta se ligji, e drejta, vizioni dhe përkushtimi për ta çuar këtë projekt deri në fund.