Katz: Nuk tërhiqemi nga Libani jugor, edhe nëse e kërkon SHBA

Izraeli nuk do të tërhiqet nga Libani jugor, edhe nëse një gjë e tillë kërkohet nga Shtetet e Bashkuara.

Kështu deklaroi ministri izraelit i Mbrojtjes, Israel Katz, gjatë aktivitetit MUNI EXPO 2026.

“Nuk do të tërhiqemi nga Libani jugor, edhe nëse ka një kërkesë amerikane për ta bërë këtë”, tha Katz, duke shtuar se rreth 200 mijë banorë libanezë të zhvendosur nuk do të lejohen të kthehen në zonat e kontrolluara nga ushtria izraelite.

“Nuk do të ketë civilë dhe nuk do të ketë terroristë. Ushtarët do të jenë brenda, banorët jashtë”, u shpreh ministri, duke shtuar se infrastruktura është shkatërruar dhe banesat konsiderohen të rrezikshme.

Ministri deklaroi gjithashtu se Izraeli nuk do të tërhiqet as nga territoret e marra nën kontroll në Siri.

“Kjo është doktrina jonë e sigurisë. Forcat e Mbrojtjes së Izraelit duhet të jenë në territorin e armikut dhe të mbrojnë komunitetet tona nga brenda atij territori”, tha ai.