Operacion antidrogë në Dibër, zbulohet parcela me mbi 1000 bimë kanabis

Një parcelë me më shumë se 1000 bimë të dyshuara narkotike është zbuluar në Dibër, ndërsa dy persona kanë rënë në prangat e policisë.

Operacioni antidrogë i koduar “Deja” u finalizua nga specialistët për Hetimin e Krimeve në Drejtorinë Vendore të Policisë Dibër, në bashkëpunim me shërbimet e Policisë së Matit dhe Kamzës.

Gjatë kontrolleve në terren dhe monitorimit me dronë nga ajri, në zonën e njohur si “Liqeni i Lukanit”, në një pronë publike në territorin e Bashkisë Dibër, policia zbuloi një parcelë të kultivuar me 1121 bimë të dyshuara Cannabis Sativa.

Në momentin e ndërhyrjes, në flagrancë u arrestuan shtetasit me inicialet A. K., 38 vjeç, banues në Kamëz, dhe A. B., 39 vjeç, banues në fshatin Derjan, Bashkia Mat.

Bimët narkotike të gjetura në parcelë u asgjësuan me anë të djegies, ndërsa materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Dibër për veprime të mëtejshme.

Policia e Dibrës ka bërë apel për qytetarët, veçanërisht banorët e zonave rurale, që të denoncojnë çdo rast apo dyshim për kultivim të bimëve narkotike.