Në bunkerë nëntokësorë apo në…/ Ku ndodhet Mojtaba Khamenei? Tre teoritë

Mungesa prej muajsh në publik e Mojtaba Khameneit, një prej figurave më të fuqishme në udhëheqjen iraniane, ka shtuar spekulimet për vendndodhjen dhe gjendjen e tij shëndetësore.

Një analizë e publikuar nga “Daily Mail”, duke iu referuar burimeve të paidentifikuara të inteligjencës dhe ish-zyrtarëve, përmend tre skenarë kryesorë që qarkullojnë për fatin e tij.

Sipas teorisë së parë, Mojtaba Khamenei ndodhet ende në Iran, i izoluar në një zonë të sigurt ose objekt nëntokësor, për shkak të masave të sigurisë dhe rikuperimit nga dëmtime të mundshme të pësuara gjatë sulmeve të mëparshme.

Një tjetër hipotezë sugjeron se ai mund të jetë larguar fshehurazi drejt Rusisë, megjithëse ky skenar konsiderohet më pak i mundshëm nga disa prej burimeve të cituara.

Ndërkohë, teoria që vlerësohet si më e besueshme nga disa analistë është se Mojtaba Khamenei është ende gjallë, por për shkak të një gjendjeje të rënduar shëndetësore nuk është në gjendje të marrë rol aktiv në drejtimin e vendit. Sipas këtij skenari, ndikimi kryesor në vendimmarrje mund të jetë zhvendosur drejt drejtuesve të Gardës Revolucionare Islamike.

Mungesa e tij në ceremonitë zyrtare, mesazhet publike dhe daljet tradicionale ka ushqyer më tej dyshimet mbi situatën reale brenda elitës politike iraniane.

Ndërkohë, në rrjetet sociale kanë qarkulluar edhe pretendime të tjera për jetën private të tij, por ato nuk janë konfirmuar nga burime zyrtare.

Deri tani autoritetet iraniane nuk kanë dhënë një sqarim publik për arsyen e mungesës së Mojtaba Khameneit, ndërsa vëmendja ndërkombëtare mbetet e përqendruar te roli i Gardës Revolucionare në zhvillimet e brendshme të Iranit.