VIZAT AMERIKANE, VENDIMI PER SHQIPERINE

Një gjykatë federale në Washington ka vendosur se politika e administratës Trump për pezullimin e përpunimit të vizave të emigrimit për shtetasit e 75 vendeve, përfshirë Shqipërinë dhe Kosovën, është në kundërshtim me ligjin.

Në një vendim të dhënë më 31 korrik, gjyqtari federal Amit Mehta arriti në përfundimin se politika e njohur si “Public Charge Policy”, e miratuar nga Sekretari i Shtetit, Marco Rubio, tejkalon kompetencat që Kongresi i ka dhënë Departamentit të Shtetit sipas Ligjit për Emigracionin dhe Shtetësinë.

Politika hyri në fuqi më 21 janar 2026 dhe urdhëronte zyrtarët konsullorë të refuzonin ose të pezullonin shqyrtimin e vizave të emigrimit për shtetasit e 75 vendeve, derisa Departamenti i Shtetit të hartonte procedura të reja për vlerësimin e rrezikut që aplikantët mund të bëheshin përfitues të ndihmës sociale në Shtetet e Bashkuara. Në listë përfshiheshin edhe Shqipëria dhe Kosova.

Gjykata urdhëroi që aplikimi konkret i paditësve të rishqyrtohet individualisht brenda 60 ditëve, por vendimi nuk e shfuqizon automatikisht politikën për të gjithë aplikantët nga 75 vendet, pasi çështja është gjykuar mbi bazën e një padie individuale.

Pas publikimit të vendimit të gjykatës, media iu drejtua Departamentit të Shtetit me një kërkesë për koment, duke pyetur nëse rishikimi i politikës për Shqipërinë dhe Kosovën ka përfunduar dhe nëse përpunimi i vizave të emigrimit do të rifillojë.

Departamenti i Shtetit nuk iu përgjigj menjëherë kërkesës për koment deri në publikimin e këtij artikulli.