Rusia përgatit dimrin e sulmeve, Ukraina kërkon shpëtim nga NATO

Sekretari i Përgjithshëm i NATO-s, Mark Rutte, deklaroi se aleanca po punon me urgjencë për t’i siguruar Ukrainës sistemet e nevojshme të mbrojtjes ajrore, pas një sulmi rus ku Kievi nuk arriti të rrëzojë asnjë raketë balistike.

Presidenti ukrainas Volodymyr Zelensky paralajmëroi se Rusia po përgatitet të rrisë ndjeshëm prodhimin e raketave përpara dimrit, kur priten sulme të reja ndaj infrastrukturës energjetike të Ukrainës.

Sipas autoriteteve ukrainase, Rusia lëshoi 24 raketa balistike gjatë sulmit të fundit, duke shkaktuar të paktën 17 viktima. Mbrojtja ajrore ukrainase arriti të rrëzojë shumicën e dronëve të përdorur në sulm, por nuk mundi të neutralizojë raketat balistike.

Zelensky tha se furnizimet me raketa për mbrojtjen ajrore nga aleatët kanë rënë ndjeshëm krahasuar me vitin e kaluar dhe kërkoi heqjen e pengesave burokratike për përshpejtimin e ndihmës ushtarake.

Kievi thekson se mungesa më e madhe lidhet me raketat interceptuese për sistemet amerikane Patriot, të vetmet që mund të përballojnë disa nga raketat më të avancuara ruse. NATO ka njoftuar se një fabrikë e re evropiane për prodhimin e raketave Patriot në Gjermani pritet të nisë punën në shtator.

Ndërkohë, Ukraina dhe SHBA po diskutojnë mundësinë që Kievi të prodhojë vetë disa komponentë të raketave Patriot, por ekspertët vlerësojnë se rritja e kapaciteteve prodhuese do të kërkojë kohë.