Dita e 70-të e protestës, Berisha: lëvizja më e fuqishme qytetare që prej viteve ’90

Kryetari i Partisë Demokratike, Sali Berisha, ka komentuar protestën qytetare që sot shënon ditën e 70-të, duke e cilësuar atë si një nga lëvizjet më të fuqishme qytetare dhe rinore në Shqipëri që prej viteve ’90.

Gjatë një komunikimi në rrjetet sociale me qytetarët, Berisha tha se protesta ka arritur të bashkojë shqiptarët brenda dhe jashtë vendit rreth çështjeve që, sipas tij, lidhen me mjedisin, lirinë dhe të ardhmen e vendit.

Ai vlerësoi veçanërisht pjesëmarrjen e të rinjve, duke deklaruar se angazhimi i tyre kundër problematikave mjedisore përbën një zhvillim të rëndësishëm për shoqërinë shqiptare.

Berisha u shpreh se Partia Demokratike do të vijojë ta mbështesë protestën, duke theksuar se kërkesat e saj janë të drejta dhe se opozita i ka ngritur këto çështje edhe në parlament, në komisione dhe në protesta.

“Pas viteve ’90, kjo është protesta më e fuqishme rinore qytetare në historinë e këtij vendi. Kjo është protesta që bashkoi shqiptarët kudo që janë në botë për një çështje të përbashkët”, deklaroi Berisha.

Ai tha se PD ka bërë thirrje për pjesëmarrje, por jo në cilësinë e një force politike, duke argumentuar se demokratët duhet të jenë pjesë e protestës si qytetarë dhe të respektojnë frymën qytetare të saj.

Berisha foli gjithashtu për disa prej sloganeve të protestuesve, përfshirë ato që vendosin në të njëjtin plan Edi Ramën dhe Sali Berishën. Sipas tij, këto slogane janë përdorur nga kundërshtarë politikë të Partisë Demokratike dhe nga grupe që ai i lidh me mbështetësit e George Sorosit.

Në përfundim, kreu i PD-së garantoi se opozita do të bëjë gjithçka që ka në dorë për të mbështetur protestën dhe kërkesat e qytetarëve, ndërsa lëvizja vijon tashmë në ditën e saj të 70-të.