Vance: Kemi bërë progres me iranianët, fokusi te nafta dhe Hormuzi

Shtetet e Bashkuara kanë bërë “njëfarë përparimi” në bisedimet me Iranin, deklaroi zëvendëspresidenti amerikan JD Vance në një intervistë për Fox News.

Vance tha se pala iraniane kërkon përfundimin e situatës së tensionuar, por sipas tij, mbetet ende e paqartë nëse autoritetet në Teheran janë të gatshme të ndërmarrin ndryshimet që kërkon Uashingtoni.

“Ata duan që kjo gjë të marrë fund. Pyetja është nëse janë në gjendje të japin gjërat që janë të nevojshme që ne të ndihemi sikur kemi marrë atë që na nevojitet nga ky angazhim”, u shpreh Vance, duke theksuar se gjatë ditëve të fundit është shënuar njëfarë progresi.

Një nga çështjet kryesore në diskutimet aktuale është garantimi i qarkullimit të naftës dhe gazit përmes Ngushticës së Hormuzit, një nga rrugët më të rëndësishme të transportit energjetik në botë.

“Po flasim me iranianët. Sigurisht, po përpiqemi të maksimizojmë sasinë e naftës dhe gazit që po del nga Ngushtica e Hormuzit. Kjo është gjëja në të cilën jemi më të përqendruar tani”, tha zëvendëspresidenti amerikan.

Vance theksoi se Uashingtoni po vlerëson gjithashtu nëse Irani është i gatshëm të ndërmarrë ndryshime afatgjata, të cilat do të mundësonin krijimin e një marrëdhënieje më të qëndrueshme mes dy vendeve.

Sipas tij, gjatë javës së fundit Irani dhe vendet e Gjirit, veçanërisht Omani, kanë zhvilluar diskutime për garantimin e lundrimit të sigurt nëpër Ngushticën e Hormuzit.

Zëvendëspresidenti amerikan nënvizoi nevojën për krijimin e një skeme të sigurt të trafikut detar për anijet që kalojnë nëpër ngushticë, ndërsa përmendi edhe shqetësimet lidhur me dyshimet për vendosjen e minave detare në këtë zonë.

Deklaratat e Vance vijnë në një moment kur siguria e Ngushticës së Hormuzit mbetet një nga çështjet kryesore në përballjen mes Uashingtonit dhe Teheranit, me ndikim të drejtpërdrejtë edhe në tregjet globale të energjisë.