Goditje e rëndë / “Çmenduria” e qirave, dalin jashtë kontrollit, shifra që tronditin shqiptarët

Të gjesh një banesë me qira në Tiranë po bëhet gjithnjë e më e shtrenjtë. Në gjashtëmujorin e parë të vitit 2026, qiraja mesatare për një apartament 1+1 arriti në 590 euro në muaj, ndërsa për një 2+1 u ngjit në 954 euro.

Të dhënat e tregut imobiliar tregojnë se rritja është veçanërisht e fortë për apartamentet 2+1, ku çmimet janë rritur rreth 26% brenda një viti.

Në disa zona, shifrat janë edhe më tronditëse. Pranë stadiumit “Air Albania”, një apartament 1+1 arrin mesatarisht në 800 euro në muaj, ndërsa për 2+1 qiratë shkojnë deri në 1,500 euro.

Edhe “Myslym Shyri” ka regjistruar një kërcim të fortë, me qiranë mesatare të një 2+1 që ka arritur në 1,400 euro, rreth 87% më shumë se një vit më parë.

Rritje të ndjeshme janë regjistruar edhe në zonat periferike. Në Astir, një 1+1 kushton mesatarisht 550 euro, ndërsa një 2+1 rreth 665 euro. Në Fresk, qiraja mesatare për 2+1 është rritur me rreth 29%, duke arritur në 450 euro.

Ekspertët e tregut e lidhin këtë situatë me kombinimin e kërkesës së lartë, ofertës së kufizuar dhe zgjerimit të qirave ditore. Tregu po ndikohet gjithashtu nga rritja e numrit të të huajve, profesionistëve dhe familjeve që kërkojnë banesa në zonat më të preferuara të kryeqytetit.

Të dhënat e INSTAT konfirmojnë gjithashtu një trend të qëndrueshëm rritjeje të çmimeve të qirave gjatë viteve të fundit.

Në këtë situatë, strehimi po kthehet në një nga kostot më të rënda për familjet shqiptare, ndërsa Tirana po afrohet gjithnjë e më shumë me një treg ku një apartament normal me qira mund të kushtojë sa një pagë e plotë mujore.