LUFTA/ IRANI SHTRENGON LAKUN NE HORMUZ

Teherani e ka bere të qartë se hapja e Ngushticës së Hormuzit nuk do të jetë një vendim i njëanshëm. Garda Revolucionare kërkoi pranimin e kushteve iraniane nga Uashingtoni, ndërsa diplomacia mes Iranit dhe Omanit vijon për të gjetur një rrugëdalje nga kriza.

Deklarata, e transmetuar nga agjencia shtetërore iraniane Tasnim, tregon se Teherani e konsideron Hormuzin jo thjesht si një korridor ndërkombëtar të transportit, por si një prej instrumenteve më të rëndësishme të fuqisë së tij strategjike.

Mesazhi për Uashingtonin është i drejtpërdrejtë: lundrimi nuk do të rikthehet plotësisht për sa kohë që Shtetet e Bashkuara nuk pranojnë kushtet iraniane dhe vazhdojnë, sipas Teheranit, të ndërhyjnë në proceset diplomatike rajonale.

Nga njëra anë, zyrtarët amerikanë kanë shfaqur optimizëm lidhur me negociatat Iran–Oman dhe mundësinë e një zgjidhjeje që do të lehtësonte krizën dhe do të mundësonte rikthimin e eksporteve të naftës.

Nga ana tjetër, struktura më e fuqishme ushtarake e Iranit sinjalizon se Teherani nuk është ende gati të heqë dorë nga një prej kartave të tij më të forta strategjike.

Ngushtica e Hormuzit është një prej korridoreve më strategjike të tregtisë globale të energjisë. Çdo kufizim i lundrimit në këtë zonë krijon menjëherë pasoja për tregjet, furnizimin me naftë dhe ekonominë botërore.

Nëse deklaratat e Gardës Revolucionare do të shndërrohen në politikë të qëndrueshme, atëherë Hormuzi nuk do të jetë më vetëm një krizë e transportit detar. Ai mund të bëhet tavolina kryesore e përplasjes së re strategjike mes Iranit dhe Shteteve të Bashkuara.

Kush do të tërhiqet i pari – Uashingtoni apo Teherani?