Tirana përvëlohet/ Braçe zbulon shkakun: Europa kërkon të heqë asfaltin dhe betonin, ne e shtojmë

Teksa Tirana po përballet me temperatura të larta, deputeti socialist Erion Braçe ka ngritur shqetësimin për ndikimin që sipërfaqet e asfaltuara dhe betoni mund të kenë në temperaturat urbane.

Në një postim në Facebook, Braçe argumenton se përdorimi i gjerë i asfaltit dhe betonit kontribuon në rritjen e nxehtësisë në qytet. Ai sjell në vëmendje edhe politikat që po diskutohen në disa vende europiane për reduktimin e sipërfaqeve të tepërta të betonizuara dhe asfaltuara dhe kthimin e tyre në hapësira të gjelbra.

Sipas tij, pemët dhe sipërfaqet e gjelbra mund të luajnë një rol të rëndësishëm në zbutjen e temperaturave në zonat urbane. Braçe shprehet kritik ndaj mungesës, sipas tij, të masave të mjaftueshme për reduktimin e efektit të nxehtësisë në kryeqytet.

Deputeti ka komentuar gjithashtu përdorimin e kondicionerëve, duke argumentuar se ata nuk e zgjidhin problemin në nivel urban, pasi nxehtësia e nxjerrë nga ambientet e brendshme përfundon jashtë.

Postimi i Braçes vjen në një periudhë kur Tirana dhe zona të tjera të vendit po përballen me temperatura të larta, duke rikthyer diskutimin mbi hapësirat e gjelbra, urbanizimin dhe mënyrat për të reduktuar efektin e ishullit të nxehtësisë në qytete.

Video Credits: Euronews Albania