Hamza akuzon Kurtin për bllokim, por në qershor kërkonte marrëveshje për konstituimin

Kryetari i Partisë Demokratike të Kosovës, Bedri Hamza, ka akuzuar Albin Kurtin dhe Lëvizjen Vetëvendosje për zvarritjen e konstituimit të Kuvendit, duke kërkuar thirrjen e menjëhershme të seancës.

Sipas Hamzës, konstituimi i Kuvendit është detyrim kushtetues dhe nuk mund të kushtëzohet nga marrëveshjet politike, kalkulimet elektorale apo interesat personale.

“Kuvendi nuk është pronë e Albin Kurtit dhe e Lëvizjes Vetëvendosje”, shkruan Hamza, ndërsa e cilëson situatën si shkelje të Kushtetutës dhe kapje të shtetit.

Por qëndrimi i tij i tanishëm duhet parë edhe përballë deklaratës së dhënë më 8 qershor. Në atë kohë, Hamza kërkonte një marrëveshje politike përpara fillimit të konstituimit të Kuvendit, duke argumentuar se vetëm kështu mund të krijoheshin shpejt dhe në mënyrë të qëndrueshme institucionet e vendit.

Dallimi qëndron te mënyra se si paraqitet sot marrëveshja politike: Hamza nuk e kundërshton dialogun mes partive, por kundërshton që mungesa e një marrëveshjeje të përdoret si kusht për të mos e konstituuar Kuvendin.

Megjithatë, ndryshimi i gjuhës është i dukshëm. Ajo që në qershor paraqitej si parakusht politik për krijimin e institucioneve, sot cilësohet si një justifikim i papranueshëm për bllokimin e Kuvendit.

Në thelb, Hamza përpiqet t’ia ngarkojë përgjegjësinë institucionale partisë fituese dhe Albin Kurtit. Por deklaratat e tij të mëparshme tregojnë se edhe vetë ai e ka lidhur konstituimin e Kuvendit me arritjen paraprake të një marrëveshjeje më të gjerë politike.