Rrethi vicioz/ Situata e brishtë: Kosova shkon prapë në zgjedhje në fund të vitit

Analisti Ben Andoni e ka cilësuar krizën politike në Kosovë si një situatë të rëndë institucionale, duke paralajmëruar se mungesa e marrëveshjes mes partive mund ta çojë vendin drejt zgjedhjeve të reja në fund të vitit.

Sipas Andonit, përgjegjësia për ngërçin nuk bie vetëm mbi Vetëvendosjen, por edhe mbi opozitën. Ai kritikoi veçanërisht mungesën e transparencës dhe akuzoi partitë se po vendosin interesat politike mbi stabilitetin institucional.

Por pjesa më shqetësuese e deklaratës së tij lidhet me lumin Ibër. Andoni e konsideroi idenë e ndryshimit të rrjedhës së tij, të artikuluar nga presidenti serb Aleksandar Vuçiq, si një precedent të rrezikshëm, pasi uji është pjesë e një sistemi ndërkufitar dhe Serbia ka detyrime ndërkombëtare për menaxhimin e tij.

Sipas analistit, fakti që një deklaratë e tillë vjen nga kreu i shtetit serb tregon se çështja nuk duhet trajtuar si retorikë politike e zakonshme.

Andoni paralajmëroi gjithashtu se Beogradi mund të jetë duke kërkuar mënyra të reja për t’iu shmangur disa prej detyrimeve ndërkombëtare që lidhen me Kosovën, duke përmendur edhe Marrëveshjen e Kumanovës.

Në këtë situatë, sipas tij, Kosova përballet njëkohësisht me një krizë të brendshme institucionale dhe një presion të ri nga Serbia, duke e bërë situatën edhe më të brishtë.