Fundi i arratisë! RENEA “mbërthen” Ylli Zallën pas muajsh në kërkim

Pas disa tentativash të mëparshme për kapjen e tij, Forcat Speciale RENEA kanë finalizuar operacionin e koduar “Fundi i Arratisë”, duke vënë në pranga 49-vjeçarin Ylli Zalla, një person i shpallur në kërkim dhe i konsideruar me rrezikshmëri të lartë shoqërore.

Sipas Policisë së Shtetit, Zalla u lokalizua në një zonë të pyllëzuar në Krujë, ku u ndërhy për arrestimin e tij. Në momentin e kapjes, 49-vjeçarit iu gjet dhe sekuestrua një armë zjarri kallashnikov dhe tre krehra.

Në pamjet e publikuara nga Policia duket momenti kur Zalla neutralizohet nga efektivët e RENEA-s. Ai shfaqet me kapele dhe shapka, ndërsa fytyrën e kishte të mbuluar.

Zalla ishte në kërkim që prej nëntorit 2025, pasi gjatë kontrolleve në banesën e tij ishin zbuluar armë, lëndë plasëse, municion dhe sende të tjera të kundërligjshme. Në kontrollet e mëvonshme, policia raportoi sekuestrimin e një tjetër arsenali armësh e municioni, lëndë narkotike, uniforma policie dhe pajisje të tjera.

Më 23 qershor, gjatë një tjetër kontrolli në banesën e tij, u gjetën një pistoletë me fishek në fole, municion luftarak, celular dhe një detektor frekuencash.

Policia deklaron se Zalla kishte mundur t’i shpëtonte disa herë forcave të rendit, ndërsa kapja e tij u realizua pas lokalizimit në zonën e pyllëzuar.

Emri i Ylli Zallës është përmendur edhe në hetime të mëparshme për vepra të rënda penale. Ai është dyshuar si bashkëpunëtor në atentatin e nëntorit 2025 në Rinas, ku u vranë Gilmando Dani dhe Muçi Shaljani, por këto dyshime mbeten pjesë e hetimit dhe nuk përbëjnë një fajësi të provuar me vendim gjyqësor.

Materialet procedurale pritet t’i referohen Prokurorisë për veprime të mëtejshme.