NATO nxjerr hartën e luftës/ Kaliningradi dhe infrastruktura ruse goditen me dronë e raketa

NATO po përgatit skenarë të ndryshëm reagimi në rast të një sulmi të mundshëm rus ndaj vendeve baltike, sipas një raportimi të medias gjermane Bild. Planet parashikojnë disa nivele reagimi, me synimin për të ndalur një ofensivë ruse dhe për t’i shtyrë forcat e Moskës drejt kufirit.

Një nga skenarët lidhet me përdorimin e avionëve luftarakë, sistemeve raketore dhe dronëve për neutralizimin e kapaciteteve ushtarake ruse që do të përdoreshin në një sulm ndaj territorit të NATO-s.

Sipas raportimit, në listën e objektivave të mundshme përfshihet edhe rajoni i Kaliningradit, ku ndodhen sisteme të mbrojtjes ajrore, raketa dhe infrastrukture ushtarake. Në skenarë përmenden gjithashtu fusha ajrore, fabrika armësh, ura dhe linja hekurudhore me rëndësi strategjike.

Një tjetër element është krijimi i një “zone autonome” përgjatë kufirit me Rusinë dhe Bjellorusinë, ku do të përdoren gjerësisht sisteme pa pilot. Përveç dronëve ajrorë, në këtë skenar parashikohet përdorimi i mjeteve tokësore robotike për zbulim dhe monitorim.

NATO po shqyrton gjithashtu mundësinë e përdorimit të dronëve për goditjen e objektivave ushtarake në thellësi të territorit rus. Megjithatë, sipas raportimit, objektivi nuk do të ishte pushtimi i territorit rus, por ndalimi i një ofensive dhe rikthimi i forcave ruse në pozicionet e tyre.

Planet vijnë në një periudhë tensioni të shtuar në krahun lindor të NATO-s, veçanërisht pas incidenteve me dronë në hapësirën ajrore të vendeve anëtare.

Sipas Bild, mesazhi që synohet t’i përcillet Moskës është i qartë: një sulm ndaj një vendi të NATO-s do të sillte një reagim të gjerë ushtarak dhe kosto të lartë për Rusinë.

Megjithatë, bëhet fjalë për skenarë të raportuar të mundshëm dhe jo për një njoftim zyrtar të NATO-s për një plan konkret sulmi ndaj Rusisë.